చరణ్‌ - బోయపాటి కాంబినేషన్‌లో సినిమా ఈ రోజు లాంఛనంగా ప్రారంభమైంది. కొణిదెల ప్రొడక్షన్స్‌ కార్యాలయంలో ఈ సినిమాకి పూజా కార్యక్రమాలు ఘనంగా నిర్వహించారు. డి.వి.వి ఎంటర్‌టైన్‌మెంట్స్‌ పతాకంపై ఈ సినిమా నిర్మితమవుతోంది. డి.వి.వి.దానయ్య ఈ సినిమాని నిర్మిస్తున్నారు. 

2018 జనవరిలో ఈ సినిమా రెగ్యులర్‌ షూటింగ్‌ జరగనుంది. బోయపాటి శీను - చరణ్‌ కాంబినేషన్‌లో సినిమా ఎప్పుడో సెట్స్‌ మీదికి వెళ్లాల్సి ఉంది. కానీ కొన్ని కారణాలతో ఆలస్యమైంది. ఎట్టకేలకు ఇన్నాళ్లకు ఈ కాంబోలో సినిమా పట్టాలెక్కింది. బోయపాటి శీను సినిమాల్లో హీరో క్యారెక్టరైజేషన్‌ చాలా రఫ్‌గా మాస్‌ అండ్‌ పవర్‌ఫుల్‌గా ఉంటుంది. 

అలాగే చరణ్‌ కోసం ఓ పవర్‌ ఫుల్‌ సబ్జెక్ట్‌నే ప్రిపేర్‌ చేశాడట బోయపాటి. ఈ సినిమా తర్వాత మెగాస్టార్‌ చిరంజీవితోనూ బోయపాటి ఓ సినిమా చేయనున్నారనీ సమాచారమ్‌. అయితే ఈ సినిమాకి చరణే నిర్మాణ బాధ్యత వహిస్తాడా? లేక వేరే వాళ్లకెవరికైనా ఛాన్సిస్తాడో చూడాలి మరి. ప్రస్తుతం చిరంజీవి 'సైరా నరసింహారెడ్డి' సినిమా పనుల్లో బిజీగా ఉన్నారు. ఈ సినిమాకి నిర్మాత చరణే. 

అలాగే చరణ్‌ మరో పక్క ప్రెస్టీజియస్‌ మూవీ 'రంగస్థలమ్‌'లో నటిస్తున్నాడు. సుకుమార్‌ దర్శకత్వంలో తెరకెక్కుతోన్న ఓ అద్భుతమైన విభిన్న ప్రేమకథ ఈ చిత్రం. 1985 కాలం నాటి లవ్‌ స్టోరీగా తెరకెక్కుతోన్న చిత్రమిది. పల్లెటూరి వాతావరణంలో చాలా ఆహ్లాదంగా తెరకెక్కుతోంది 'రంగస్థలమ్‌'. చరణ్‌ గెటప్‌, బాడీ లాంగ్వేజ్‌ అంతా సరికొత్తగా ఉండబోతున్నాయి. ఇంతకు ముందెన్నడూ చరణ్‌ని చూడని గెటప్‌లో చూడబోతున్నాం ఈ సినిమాలో. ముద్దుగుమ్మ సమంత ఈ సినిమాలో చరణ్‌తో తొలిసారిగా జత కడుతోంది. వచ్చే ఏడాదిలోనే ఈ సినిమా విడుదల ఉండనుంది.