కొత్త క‌థ‌లెక్క‌డి నుంచో పుట్ట‌వు. పాత క‌థ‌ల నుంచే రీ సైకిల్ అవుతుంటాయి. ఈ విష‌యాన్ని ద‌ర్శ‌కులు కూడా ఒప్పుకుంటారు. అందుకే ఏ క‌మ‌ర్షియ‌ల్ సినిమాచూసినా.. అందులో ఎన్నో కొన్ని పాత సినిమాల ఛాయ‌లు క‌నిపిస్తుంటాయి.  

ప్ర‌స్తుతం రామ్ చ‌ర‌ణ్ న‌టిస్తున్న `విన‌య విధేయ రామ` కూడా ఓ పాత సూప‌ర్ హిట్ సినిమాకి స్ఫూర్తి అని తేలింది. అదే..  చిరంజీవి ఆల్ టైమ్ సూప‌ర్ హిట్స్‌లో ఒక‌టైన‌.. 'గ్యాంగ్ లీడ‌ర్‌'. అవును.. గ్యాంగ్ లీడ‌ర్‌కీ, విన‌య విధేయ రామ‌కీ ద‌గ్గ‌ర పోలిక‌లు ఉన్నాయ‌ట‌. త‌న అన్న‌య్య‌ని చంపిన వాళ్ల‌పై క‌థానాయ‌కుడు ఎలా ప్ర‌తీకారం తీర్చుకున్నాడ‌న్న‌ది గ్యాంగ్ లీడ‌ర్ క‌థ‌. 

విన‌య విధేయ రామ పాయింట్ కూడా అదేన‌ట‌. రామ్‌చ‌ర‌ణ్ అన్నయ్య‌ని విల‌న్ గ్యాంగ్ చంపేస్తే... వాళ్ల‌పై త‌ను ప్ర‌తీకారం తీర్చుకుంటాడ‌ట‌. అదెలా అన్న‌దే.. ఈ సినిమా స్టోరీ. చ‌ర‌ణ్ అన్న‌య్య‌లుగా ప్ర‌శాంత్‌, ఆర్య‌న్ రాజేష్ న‌టిస్తున్నారు. ఇందులో ప్ర‌శాంత్‌ని విల‌న్లు దారుణంగా చంపేస్తార్ట‌. ఆ విష‌యం తెలుసుకుని హీరో ఎలా రియాక్ట్ అయ్యాడ‌న్న‌దే క‌థ‌. మ‌రి అప్ప‌టి గ్యాంగ్ లీడ‌ర్‌ని... ఇప్పుడు చ‌ర‌ణ్‌తో బోయ‌పాటి శ్రీ‌ను ఎలా తీస్తాడో చూడాలి.