ఎప్పటికప్పుడే సంచలన ట్వీట్స్‌తో ప్రత్యేక ఆకర్షణగా వార్తలో నిలిచే రామ్‌గోపాల్‌ వర్మ తాజాగా ఓ ఆశక్తికరమైన ట్వీట్‌ చేశాడు. ప్రస్తుతం జరుగుతున్న రాజకీయ పరిణామాలపై ఆయన తన అభిప్రాయాన్ని చెబుతూ ఈ ట్వీట్‌ చేశాడు. నిరవ్‌ మోడీ కుంభకోణం, బీజేపీ కక్ష్య సాధింపు, కార్తీ చిదంబరం అరెస్ట్‌ వంటి తదితర రాజకీయ పరిణామాల నేపథ్యంలో వర్మ ఈ ట్వీటేశాడు. ఇంతకన్నా గొప్ప స్క్రిప్ట్‌ ఎవరైనా తయారు చేయగలడా? అంటూ వర్మ వేసిన ట్వీట్‌తో పలు ఆశక్తికరమైన విషయాలు వెలుగు చూస్తున్నాయి.

అంటే బహుశా వర్మ పైన పేర్కొన్న రాజకీయ పరిణామాల నేపథ్యంలో సినిమా తీయబోతున్నాడేమో అనిపిస్తోంది ఈ ట్వీట్‌ దృష్ట్యా.అయినా హాట్‌ టాపిక్‌గా ఏ అంశం అయితే ఉంటుందో, ఆ అంశంపై సినిమా తీయడం వర్మకి అలవాటు. ఇటీవల కాలంలో రాజకీయాల్లో ఈ అంశాలే హాట్‌ టాపిక్‌గా నిలుస్తున్నాయి. వీటిపై వర్మ ఏమైనా స్క్రిప్టు తయారు చేసే పనిలో ఉన్నాడో ఏమో చూడాలి మరి. మరో పక్క వర్మ తెరకెక్కించబోయే ఎన్టీఆర్‌ బయోపిక్‌ అయిన 'లక్ష్మీస్‌ ఎన్టీఆర్‌' సినిమా రాజకీయ నేపథ్యంలోనే ఉండబోతోంది.

లక్ష్మీ పార్వతి యాంగిల్‌లో ఎన్టీఆర్‌ బయోపిక్‌ని తెరకెక్కిస్తాననీ వర్మ చెప్పిన సంగతి తెలిసిందే.అయితే ఆ ప్రాజెక్ట్‌ ఇంకా పట్టాలెక్కలేదు. కానీ ఇప్పుడు మరో రాజకీయ నేపథ్యం ఉన్న ప్రాజెక్ట్‌కి వర్మ పావులు కదుపుతున్నాడో ఏమోననిపిస్తోంది. ఇదిలా ఉంటే, నాగార్జునతో వర్మ 'ఆఫీసర్‌' అనే యాక్షన్‌ ఎంటర్‌టైనర్‌ని తెరకెక్కిస్తున్న సంగతి తెలిసిందే. ఈ సినిమా ప్రస్తుతం షూటింగ్‌ దశలో ఉంది. ముంబయ్‌లో 'ఆఫీసర్‌' సినిమా శరవేగంగా షూటింగ్‌ జరుపుకుంటోంది.