`ఇస్మార్ట్ శంక‌ర్‌`తో ఓ సూప‌ర్ హిట్టు కొట్టాడు రామ్ పోతినేని. త‌న కెరీర్‌లోనే ఇదే బిగ్గెస్ట్ హిట్‌. అత్య‌ధిక వ‌సూళ్లు అందుకున్న సినిమా కూడా ఇదే. ఆ విజ‌యానందంలోనే మ‌రో సినిమాకి శ్రీ‌కారం చుట్టేశాడు. రామ్ క‌థానాయ‌కుడిగా స్ర‌వంతి మూవీస్ ఓ కొత్త చిత్రం మొద‌లెట్టింది. అదే `రెడ్‌`. కిషోర్ తిరుమ‌ల ద‌ర్శ‌క‌త్వం వ‌హిస్తున్నాడు. వీరిద్ద‌రి కాంబినేష‌న్‌లో రూపుదిద్దుకుంటున్న హ్యాట్రిక్ సినిమా ఇది. దీపావ‌ళి సంద‌ర్భంగా ఫ‌స్ట్ లుక్ కూడా విడుద‌ల చేశారు.
ఈ లుక్‌లో మ‌హా మాస్‌గా క‌నిపిస్తున్నాడు రామ్. అయితే.... ఇందులో రామ్ ఒక్క‌డు కాద‌ట. ఇద్ద‌ర‌ట. రెండో పాత్ర క్లాస్‌గా ఉంటుంద‌ని తెలుస్తోంది. ఓ త‌మిళ చిత్రానికి ఇది రీమేక్‌. క‌థ‌లో భారీ మార్పులు చేర్పులూ చేసిన‌ట్టు తెలుస్తోంది. ఇందులో ఇద్ద‌రు క‌థానాయిక‌ల‌కు చోటుంది. ఓ నాయిక‌గా మాళ‌విక శ‌ర్మ‌ని ఎంచుకున్నారు. రెండో నాయిక ఎవ‌ర్న‌న‌ది తెలియాల్సివుంది. వ‌చ్చే నెల‌లో షూటింగ్ మొద‌లెడ‌తారు. 2020 వేస‌విలో విడుద‌ల చేస్తారు.
