రానా ప్రధాన పాత్రలో నటించిన బహుభాషా చిత్రం ‘హాథీ మేరీ సాథీ’ టీజర్‌ వెరీ లేటెస్ట్‌గా రిలీజ్‌ చేశారు. ఈ సినిమాలో అడవి బిడ్డలా రానా కనిపిస్తున్న సంగతి తెలిసిందే. ఏనుగుల గుంపుకు రాజులా కనిపించనున్నాడు. దాదాపు టార్జాన్‌ పాత్రన్నమాట. అడవినే నమ్ముకుని బతికే ఈ అడవి బిడ్డకి, మనుషుల నుండి ఎటువంటి కష్టాలు ఎదురయ్యాయి? తన అడవి జోలికి వస్తే ఈ అడవి బిడ్డ ఏం చేశాడు అన్నదే కథాంశం. గతంలో ఇలాంటి నేపథ్యంలో చాలా సినిమాలు తెరకెక్కినా ఈ సినిమాలో ఏదో కొత్త విషయం ఉందని టీజర్‌ ద్వారా తెలుస్తోంది. రానాతో పాటు, తమిళ నటుడు విష్ణు విశాల్‌, సామ్రాట్‌ ఇతర కీలక పాత్రలు పోషిస్తున్నారు. 'ప్రభు సోల్మన్' దర్శకత్వం వహిస్తున్న ఈ సినిమాలో శ్రియ, జోయ హుస్సేన్‌ కథానాయికలుగా నటిస్తున్నారు. ఏప్రిల్‌లో సినిమాని విడుదల చేయనున్నారు.
ప్రస్తుతం కేరళ అడవుల్లో షూటింగ్‌ జరుపుకుంటున్న ఈ సినిమాని తెలుగులో ‘అరణ్య’ టైటిల్‌తోనూ, తమిళంలో ‘కాదన్‌’ టైటిల్‌తో విడుదల చేస్తున్నారు. ఇంతవరకూ ఫస్ట్‌లుక్‌తోనే ఆసక్తి కలిగించిన రానా, తాజా టీజర్‌తో మరోసారి ఆకట్టుకున్నాడు. అద్భుతమైన నటన కనబరిచాడు. టార్జాన్‌లా జంతువులూ, పక్షులకు మాత్రమే అర్ధమయ్యే ఓ రకమైన భాషలో మాట్లాడుతున్నట్లుగా విచిత్రమైన హావభావాలు ప్రదర్శిస్తున్న రానా లుక్స్‌తో టీజర్‌ స్టార్ట్‌ అయ్యింది. ‘నువ్వెవరు.. దేవుడివా.? అని బ్యాక్‌ గ్రౌండ్‌లో ఓ వాయిస్‌, ‘బల్‌దేవ్‌’ అని రానా సమాధానం ఆ వెనకే గాండ్రిస్తున్న పులి.. తర్వాత ఓ పెద్ద ఏనుగుల గుంపును వెంటేసుకుని దూకుడుగా రానా నడిచొస్తున్న అద్భుతమైన దృశ్యంతో టీజర్‌ ఎండ్‌ చేశారు.
మొత్తానికి మన భళ్లాలదేవుడు, ‘బల్‌ దేవ్‌’గా అడవిలో గట్టి పోరాటాలు చేయనున్నాడని ‘హాథీ మేరీ సాథీ’ టీజర్‌ ద్వారా అర్ధమవుతోందన్న మాట.
