హీరోగానే కాకుండా, విలన్‌గా, గెస్ట్‌గా, క్యారెక్టర్‌ ఆర్టిస్టుగా కథ నచ్చితే, నిడివితో సంబంధం లేకుండా, ఏ రోల్‌లో అయినా కనిపించేందుకు సిద్ధంగా ఉంటాడు యంగ్‌ అండ్‌ ఎనర్జిటిక్‌ రానా దగ్గుబాటి. ప్రస్తుతం రానా చేతిలో చాలానే ప్రాజెక్టులున్నాయి. లోకల్‌ ప్రాజెక్టులతో పాటు, బహుభాషా ప్రాజెక్టుల్లోనూ రానా నటించేస్తుంటాడు. అలా తెలుగులో 'విరాటపర్వం' నిర్మాణం జరుగుతోంది.
బహుభాషా చిత్రంగా 'హథీ మేరే సాథీ' చిత్రం రూపుదిద్దుకుంటోంది. ఈ లోగా రానాతో గెస్ట్‌ రోల్‌ చేయించాలన్న ఆలోచన వచ్చిందట 'వెంకీ మామ' డైరెక్టర్‌ బాబీకి. 'వెంకీమామ' ఇప్పటికే ఫ్యామిలీ మల్టీ స్టారర్‌గా రూపొందుతోంది. వెంకటేష్‌, నాగచైతన్య హీరోలుగా నటిస్తున్న సంగతి తెలిసిందే ఈ సినిమాలో. ఈ కాంబినేషన్‌కి రానా కూడా కలిస్తే, అదనపు వెయిట్‌ వస్తుందని భావించిన 'వెంకీ మామ' యూనిట్‌ రానాని సంప్రదించారట.
అందుకు రానా గ్రీన్‌ సిగ్నల్‌ ఇచ్చాడనీ సమాచారమ్‌. సో ఈ ఫ్యామిలీ మూవీకి మరో ఫ్యామిలీ మెంబర్‌ యాడ్‌ అయ్యాడన్న టాక్‌ వినిపిస్తోంది. ప్రస్తుతం శరవేగంగా షూటింగ్‌ జరుపుకుంటోన్న 'వెంకీ మామ' దసరాకి విడుదలయ్యే అవకాశాలున్నట్లు తెలుస్తోంది. ఈ సినిమాలో పాయల్‌ రాజ్‌పుత్‌, రాశీఖన్నా హీరోయిన్లుగా నటిస్తున్నారు. ఫుల్‌ లెంగ్త్‌ కామెడీ ఎంటర్‌టైనర్‌గా 'వెంకీమామ'ను రూపొందిస్తున్నారు.
