మ‌న హీరోలు స‌క‌ల క‌ళా వ‌ల్ల‌భులు. త‌మ‌లోని ప్ర‌తిభ‌ని వివిధ రూపాల్లో బ‌య‌ట‌కు తీసుకొస్తుంటారు. కొంత‌మంది క‌థ‌లు రాస్తుంటే, ఇంకొంత‌మంది పాట‌లు పాడుతూ అల‌రిస్తుంటారు. మ‌న హీరోల్లో చాలా మంది గాయ‌కుల జాబితాలోనూ స్థానం సంపాదించుకున్నారు. వాళ్ల‌లో ఇప్పుడు రానా కూడా చేరిపోయాడు.
రానాది మంచి బేస్ వాయిస్‌. త‌న గొంతులో డైలాలుగు గంభీరంగా ప‌లుకుతాయి. అలాంటి గొంతుతోనే ఓ పాట పాడిస్తే ఎలా ఉంటుంద‌న్న ఆలోచ‌న వ‌చ్చింది. అందుకే `విరాట‌ప‌ర్వం`లో రానా కోసం ఓ పాట పెట్టేశారు. వేణు ఉడుగుల ద‌ర్శ‌క‌త్వం వ‌హించిన చిత్ర‌మిది. సాయి ప‌ల్ల‌వి, ప్రియ‌మ‌ణి ప్ర‌ధాన పాత్ర‌లు పోషించారు. త్వ‌ర‌లోనే విడుద‌ల కానుంది. ఈసినిమాల కోసం రానా ఓ పాట పాడారు. సురేష్ బొబ్బిలి సంగీతం అందించారు. ఇదో విప్ల‌వాత్మ‌క గీత‌మ‌ని, అందులో కొన్ని పంక్తులు డైలాగుల రూపంలో సాగుతాయ‌ని, దాన్ని రానా గొంతుతోనే వినిపిస్తే బాగుంటుంద‌ని చిత్ర‌బృందం భావించింద‌ని, అందుకే రానాతో ఈ పాట పాడించార‌ని స‌మాచారం. త్వ‌ర‌లోనే ఈ పాట‌ని విడుద‌ల చేస్తారు. అయితే విరాట‌ప‌ర్వం సినిమాని ఎప్పుడు విడుద‌ల చేస్తార‌న్న విష‌యంలో ఎలాంటి క్లారిటీ లేదు. ఈ సినిమాకి ఓటీటీ ఆఫ‌ర్లు వ‌స్తూనే ఉన్నాయి. అయితే థియేట‌ర్ల‌లోనే విడుద‌ల చేయాల‌ని సురేష్ బాబు ఫిక్స‌య్యారు. అందుకు అనువైన తేదీ కోసం ఎదురు చూస్తున్నారు.
