కొందరు చెబితే ఆ మాటలు బాగా ఎక్కేస్తుంటాయ్‌. అలాంటి వారిలో శర్వానంద్‌ ఒకడు. శర్వానంద్‌ ప్రస్తుతం 'రణరంగం' చిత్రంలో నటిస్తున్న సంగతి తెలిసిందే. తాజాగా ఈ సినిమా టీజర్‌ విడుదలైంది. టీజర్‌లో 'దేవున్ని నమ్మాలంటే, భక్తి ఉంటే సరిపోతుంది. కానీ మనిషిని నమ్మాలంటే ధైర్యం ఉండాలి..' అనే మాట నేటి సిట్యువేషన్స్‌లో బాగా కనెక్ట్‌ అయిపోతుంది. టీజర్‌కి ఈ మాటే హైలైట్‌గా నిలిచింది. దీంతో పాటు, 'కోపాన్నీ, దాహాన్నీ ఇంకొకరు శాసించే స్థితిలో మనం ఉండకూడదు' వంటి డైలాగులు కూడా కనెక్టివ్‌గా అనిపిస్తున్నాయి. ఈ సినిమాలో శర్వానంద్‌ రెండు డిఫరెంట్‌ గెటప్స్‌లో కనిపిస్తున్న సంగతి తెలిసిందే.
'కొందరికి అతను నేరస్థుడు.. కొందరికి మాత్రం హీరో..' అంటూ 90ల కాలం నాటి కథని టీజర్‌తో చెప్పే ప్రయత్నం చేశారు. హీరోయిన్స్‌గా నటిస్తున్న కాజల్‌ అగర్వాల్‌, కళ్యాణీ ప్రియదర్శిన్‌ ఇద్దరికీ ఈ టీజర్‌లో చోటు దక్కింది. సితార ఎంటర్‌టైన్‌మెంట్స్‌ బ్యానర్‌లో ఈ సినిమా తెరకెక్కింది. సుధీర్‌ వర్మ దర్శకుడు. ఇంతవరకూ ఫస్ట్‌లుక్‌ తప్ప ఈ సినిమా గురించి చిన్న క్లూ కూడా ఇవ్వకపోయినా, ఫస్ట్‌ టీజర్‌ కేక పుట్టించేసింది. టీజర్‌ వచ్చాక సినిమాపై అంచనాలు పెరిగాయి. ఆగస్ట్‌లో 'రణరంగం' ప్రేక్షకుల ముందుకు రానుంది.
