గత నెల 30న ప్రేక్షకుల ముందుకు వచ్చిన 'రంగస్థలం' చిత్రం ఏకధాటిగా వసూళ్లు కొల్లగొడుతూనే ఉంది. వసూళ్ల జోరు ఏ మాత్రం తగ్గడం లేదు ఈ సినిమాకి. మధ్యలో మహేష్‌బాబు నటించిన 'భరత్‌ అనే నేను' పెద్ద చిత్రం విడుదలైనా కానీ మెగా పవర్‌ స్టార్‌ రామ్‌చరణ్‌ 'రంగస్థలం' మేనియా తగ్గడం లేదు. ఓవరాల్‌గా గ్రాస్‌ 200 కోట్లకు చేరిందని అఫీషియల్‌గా డిక్లేర్‌ చేశారు. 

120 కోట్ల షేర్‌ దక్కించుకుంది ఈ సినిమా. ఇది మామూలు విషయం కాదు, ఇక ఓవర్సీస్‌లో ఇంతవరకూ అకౌంటే లేని రామ్‌చరణ్‌ ఈ సినిమాతో ఏకంగా ఇంతవరకూ ఉన్న ఓవర్సీస్‌ రికార్డులన్నీ బద్దలు కొట్టేశాడు. మెగా పవర్‌ స్టార్‌ స్టామినా అంటే ఇది అని చూపించాడు. సుకుమార్‌ డైరెక్షన్‌లో తెరకెక్కిన 'రంగస్థలం' చిత్రం విడుదలకు ముందు ఎక్స్‌పెక్టేషన్స్‌ అధికంగా ఉన్నప్పటికీ, ఆ ఎక్స్‌పెక్టేషన్స్‌ని అందుకోవడంలో ఎంత మాత్రం విజయం సాధిస్తుందో ఎవ్వరికీ నమ్మకం లేదు. కానీ సినిమా విడుదలయ్యాక అందరి అనుమానాలు పటాపంచలయ్యేలా రికార్డుల మోత మోగించింది. 

ఈ మధ్య కాలంలో వారం రోజులకు మించి రెండో వారం ఆడిందే లేదు. అలాంటిది విడుదలై నెల కావస్తున్నా, 'రంగస్థలం' సినిమా దూకుడు తగ్గకపోవడం ఆశ్చర్యపరుస్తోంది. ఈ సినిమాలో ఒక్కో అంశాన్ని మళ్లీ మళ్లీ చూడాలనిపించేలా చిత్రీకరించడం, అన్నింటికీ మించి, 'చిట్టిబాబు'గా రామ్‌చరణ్‌ని చూసేందుకు రెండు కళ్లూ చాలకపోవడమే ఈ స్థాయిలో వసూళ్లకు ముఖ్య కారణం. 

చూడాలి మరి, 'రంగస్థలం' ఇంకా ఇంకా ఎన్నెన్ని రికార్డులు కొల్లగొడుతుందో.!