రామ్ గోపాల్ వర్మపై ప్రస్తుతం చాలా సినిమాలు తెరకెక్కుతున్నాయి. అప్పట్లో ఒక టీవీ ఛానల్ డిబేట్ లో పంతానికి పోయి సీనియర్ పాటల రచయిత జొన్నవిత్తుల ఆయనపై ఒక సినిమా తీస్తానని ప్రకటించారు. 'ఆర్జీవీ: రోజూ గిల్లే వాడు' అనే టైటిల్ తో ప్రస్తుతం ఆయన సినిమా తెరకెక్కిస్తున్నారు. ఈ సినిమా కాకుండా రామ్ గోపాల్ వర్మ పై మరో అర డజను చిత్రాలు షూటింగ్ జరుపుకుంటున్నాయి. వాటిలో 'రాంగ్ గోపాల్ వర్మ' కూడా ఒకటి. ఈ సినిమాను సినీ విమర్శకుడు, జర్నలిస్టు అయిన ప్రభు రూపొందిస్తున్నారు.
ఈ సినిమాలో రామ్ గోపాల్ వర్మ పాత్రను ప్రముఖ కమెడియన్ షకలక శంకర్ పోషిస్తున్నారు. మరో కీలక పాత్రలో సినీ విశ్లేషకుడు కత్తి మహేష్ నటిస్తుండడం విశేషం. ఈ సినిమా షూటింగ్ గత కొన్ని రోజులుగా హైదరాబాదులోని ఫిలింనగర్లో జరుగుతోంది. ఇప్పటికే షకలక శంకర్ - కత్తి మహేష్ పై కొన్ని కీలకమైన సన్నివేశాలు కూడా చిత్రీకరణ జరిపారట. అయితే రాముడిపై అనుచిత వ్యాఖ్యలు చేసిన కారణంగా హైదరాబాద్ పోలీసులు కత్తి మహేష్ ను ఈమధ్య అరెస్టు చేశారు. దీంతో ఈ 'రాంగ్ గోపాల్ వర్మ' చిత్రం షూటింగుకు అంతరాయం ఏర్పడింది.
కత్తి మహేష్ ప్రస్తుతం రిమాండ్లో ఉన్నారు కాబట్టి బయటకు వచ్చేందుకు రెండు వారాల సమయం పట్టేలా ఉంది. ఆయన బయటకు వస్తే కానీ షకలక శంకర్ కత్తి మహేష్ కాంబినేషన్ లో ఉన్న సన్నివేశాల చిత్రీకరణకు వీలుకాదు.
