తెలుగులో 'పెళ్లి చూపులు' సినిమాతో పాపులరైన ముద్దుగుమ్మ రీతూ వర్మ. అంతకు ముందే పలు చిత్రాల్లో హీరోయిన్స్‌కి చెల్లెలి పాత్రల్లోనూ, ఫ్రెండ్స్‌ పాత్రల్లోనూ కనిపించి తన నటనతో ఆకట్టుకున్న ఈ ముద్దుగుమ్మ 'పెళ్లి చూపులు' సినిమాతో రాత్రికి రాత్రే స్టార్‌ హీరోయిన్‌ అయిపోయింది. ఈ సినిమాలో రీతూ వర్మ నటనకు మంచి మార్కులు పడ్డాయి. 

విమర్శకుల ప్రశంసలూ దక్కించుకుందీ అందాల భామ. అంతేనా ఆ వెంటనే నిఖిల్‌ హీరోగా వచ్చిన 'కేశవ' సినిమాలో హీరోయిన్‌గానూ ఛాన్స్‌ కొట్టేసింది. లక్కీగా 'కేశవ'తో కూడా ఈ ముద్దుగుమ్మ మరో హిట్‌ని తన ఖాతాలో వేసేసుకుంది. ఇక తెలుగు సంగతిలా ఉంటే, తమిళంలోనూ ఈ బ్యూటీ హాట్‌ హాట్‌ ఆఫర్స్‌నే దక్కించుకుంటోంది. తమిళంలో అగ్రహీరోల్లో ఒకరైన విక్రమ్‌ సరసన 'ధృవ నక్షత్రం' సినిమాలో రీతూ వర్మ హీరోయిన్‌గా ఛాన్స్‌ దక్కించుకుంది. విక్రమ్‌ సరసన హీరోయిన్‌గా అంటే రీతూకి అది కెరీర్‌ బెస్ట్‌ ఛాన్సే అనుకోవాలి. ఈ సినిమా ప్రస్తుతం శరవేగంగా షూటింగ్‌ జరుపుకుంటోంది. త్వరలోనే విడుదలకు సిద్ధమవుతోంది. 

దీంతో పాటు మలయాళ సూపర్‌ స్టార్‌ ముమ్ముట్టి తనయుడు దుల్కర్‌ సల్మాన్‌ హీరోగా తమిళంలోనే తెరకెక్కుతోన్న 'కన్నుం కన్నుం కొళ్లాయ్‌ అడైతాల్‌' అనే సినిమాలోనూ నటిస్తోంది. ఇవే కాక పలు తెలుగు చిత్రాల్లో కూడా ఈ ముద్దుగుమ్మకి ఆఫర్స్‌ వస్తున్నాయట. అలాగే తమిళంలోనూ ఇంకా మంచి మంచి ఆఫర్స్‌ అందుకుంటోందట. త్వరలోనే ఆ వివరాలన్నీ చెబుతానంటోందీ ముద్దుగుమ్మ. 

ఆ వివరాల సంగతి పక్కన పెడితే, వరుస ఆఫర్లు దక్కించుకుంటూ, బిజీగా గడపేస్తున్నానని అనిపించుకోవడం కన్నా, నటిగా మంచి గుర్తింపు తెచ్చుకునే పాత్రల్ని ఎంచుకుంటోంది రీతూ వర్మ అనిపించుకోవడంలోనే అసలైన తృప్తి ఉందంటోంది అందాల రీతూవర్మ.