రామ్‌గోపాల్‌ వర్మ ఎన్టీఆర్‌ బయోపిక్‌ని అనౌన్స్‌ చేసినప్పటి నుండే సెన్సేషన్‌ స్టార్ట్‌ అయ్యింది. అందులోనూ ఆయన 'లక్ష్మీస్‌ ఎన్టీఆర్‌' అంటూ టైటిల్‌ పెట్టి, లక్ష్మీ పార్వతి యాంగిల్‌ నుండి ఈ బయోపిక్‌ని తెరకెక్కిస్తానన్నారు. దాంతో మరీ ఆశక్తి నెలకొంది. కాగా ఈ సినిమాలో లక్ష్మీ పార్వతి క్యారెక్టర్‌లో ఎవరు నటిస్తారన్న విషయంపై ప్రస్తుతం చర్చ బాగా జరుగుతోంది. అయితే ఈ క్యారెక్టర్‌కి సంబంధించి, వైఎస్సార్‌సీపీ ఎమ్మెల్యే రోజా పేరు బాగా వినిపిస్తోంది. ఈ సందర్భంగా రోజా స్పందించింది. వర్మ అడిగితే ఆలోచిస్తానని రోజా చెప్పడంతో ఆమె ఈ క్యారెక్టర్‌ చేసేందుకు సుముఖంగా ఉన్నట్లేనని తెలుస్తోంది. 150 చిత్రాల్లో హీరోయిన్‌గా నటించిన అనుభవం రోజాకి ఉండడంతో ఆమె ఈ క్యారెక్టర్‌కి సూటవుతుందనీ అభిమానులు అనుకుంటున్నారు. ఆ మాటనీ ఆమె అంగీకరించింది. 'అవును అనుభవం ఉన్న మాట వాస్తవమే. జనం అనుకోవడంలోనూ తప్పు లేదు. అయితే ప్రస్తుతం నేను ఏ సినిమాల్లోనూ నటించడం లేదు. రాజకీయాలతో బిజీగా ఉన్నాను. పార్టీ వ్యవహారాలు, నియోజక వర్గం అభివృధ్ధి పనుల్లో క్షణం తీరిక లేకుండా గడుపుతున్నాను. సో సినిమాల గురించి ఆలోచన చేసే తీరిక ప్రస్తుతం నాకు లేదు. అయితే వర్మ ఆడిగితే ఆలోచిస్తాను..' అంటూ రోజా తన మనసులో మాట చెప్పకనే చెప్పేశారు. అభిమానులకు దగ్గరగా ఉండేందుకే బుల్లితెరపై 'జబర్దస్త్‌' ప్రోగ్రాం చేస్తున్నాను అన్నారు రోజా. అయితే ఆమె మాటల వెనుక ఆంతర్యాన్ని వర్మ అర్ధం చేసుకుని, రోజాని సంప్రదిస్తే, జనం అనుకుంటున్నది నిజం అయినా కావచ్చునేమో!