రాజ‌మౌళి రూపొందిస్తున్న మ‌రో భారీ బ‌డ్జెట్ - పాన్ ఇండియా సినిమా RRR. ఈ సినిమా ఎప్పుడో విడుదల కావాలి. కానీ ర‌క‌ర‌కాల కార‌ణాల వ‌ల్ల వాయిదా ప‌డుతూ వ‌చ్చింది. అక్టోబ‌రు 13న ఈ సినిమా రావ‌డం ప‌క్కా అన్నారంతా. కానీ అదీ కుద‌ర్లేదు. 2022 సంక్రాంతి బ‌రిలో నిలుస్తుంద‌ని అంచ‌నా వేశారు. సంక్రాంతికీ సినిమా వ‌చ్చే అవ‌కాశాల్లేవు. ఇప్పుడు అంద‌రి దృష్టీ 2022 వేస‌వికే. RRR వేస‌వికి రావ‌డం దాదాపుగా ఖాయమైంది. ఇలాంటి భారీ బ‌డ్జెట్ చిత్రాల‌కు వేస‌వే స‌రైంది కూడా.

RRR షూట్ ఎప్పుడో పూర్త‌య్యింది. పోస్ట్ ప్రొడ‌క్ష‌న్ ప‌నులూ వేగ‌వంతంగా సాగుతున్నాయి. అవ‌న్నీ ఓ నెల‌లో కొలిక్కి వ‌చ్చేయొచ్చు. ఆ త‌ర‌వాత‌.. వేస‌వి వ‌ర‌కూ ఆగాల్సి ఉంటుంది. ఈలోగా RRR ని ఇంకాస్త బెట‌ర్ గా తీర్చిదిద్దితే ఎలా ఉంటుందంటూ కొత్త ఆలోచ‌న‌లో ప‌డ్డాడు రాజ‌మౌళి. ఈ సినిమాలో కొన్ని సీన్లు రీషూట్ చేయాల‌ని నిర్ణ‌యించుకున్న‌ట్టు ఇన్ సైడ్ వ‌ర్గాల టాక్‌. ముఖ్యంగా ఎన్టీఆర్ - ఒలివియా మోరిస్ ల‌పై ల‌వ్ ట్రాక్ ని మ‌ళ్లీ కొత్త‌గా రాసి, తీయాల‌ని అనుకుంటున్నాడ‌ట‌. వీటితో పాటు ఒక‌ట్రెండు సీన్లు రీషూట్ చేసే ఉద్దేశ్యాలు ఉన్నాయ‌ని తెలుస్తోంది. సో... RRR షూటింగ్ ప‌రంప‌ర ఇంకా కొన‌సాగుతూనే ఉంద‌న్న‌మాట‌.