'ఆర్‌ఆర్‌ఆర్‌' సినిమా అనౌన్స్‌ చేసిన తర్వాత, టైటిల్‌పై జక్కన్న ఓ కాంటెస్ట్‌ నిర్వహించాడు. రామ్‌చరణ్‌, ఎన్టీఆర్‌ ఫ్యాన్స్‌ ఉత్సాహంగా ఈ టైటిల్‌ కాంటెస్ట్‌లో పాల్గొని తమకు తోచిన టైటిల్స్‌ని ఇన్నోవేటివ్‌గా డిజైన్స్‌తో సహా రూపొందించి జక్కన్నకు పంపించారు. అయితే, వాటిలో ఫైనల్‌ చేసిందేదీ జక్కన్న రివీల్‌ చేయలేదనుకోండి. తాజాగా ఈ సినిమా కోసం ఎక్కువ మంది నోళ్లలో నానిన టైటిల్‌ 'రామ రావణ రాజ్యం' వేరే నిర్మాణ సంస్థ చేజిక్కించుకోవడంతో, ఇప్పుడు 'ఆర్‌ఆర్‌ఆర్‌' టైటిల్‌ ముచ్చట కొత్తగా తెరపైకి వచ్చింది.
అయితే, జక్కన్న అండ్‌ టీమ్‌ ఈ విషయమై ఎలాంటి స్పందన ఇవ్వకపోవడంతో, ఆల్రెడీ జక్కన్న 'ఆర్‌ఆర్‌ఆర్‌' టైటిల్‌పై పక్కా లెక్కలతో ఉన్నాడని ఫ్యాన్స్‌ భావిస్తున్నారు. ఈ సినిమా కోసం కనీ వినీ ఎరుగని ఓ పవర్‌ ఫుల్‌ టైటిల్‌ని జక్కన్న ఆల్రెడీ సిద్ధం చేసి ఉంచాడని అనుకుంటున్నారు. లేటెస్ట్‌ ఇన్‌ఫామేషన్‌ ప్రకారం, ఈ సంక్రాంతికి 'ఆర్‌ఆర్‌ఆర్‌' టైటిల్‌ కన్‌ఫామ్‌ చేయనున్నారని తెలుస్తోంది. అంతేకాదు, సినిమాకి సంబంధించిన ఓ బ్యూటిఫుల్‌ సర్‌ప్రైజ్‌ కూడా ఈ సంక్రాంతికి విడుదల చేసేందుకు సన్నాహాలు జరుగుతున్నాయట.
ఓ చిన్నపాటి టీజర్‌లా కానీ, ఫస్ట్‌ గ్లింప్స్‌లా కానీ, ఆ సర్‌ప్రైజ్‌ ఉండబోతోందనీ తెలుస్తోంది. ఇప్పటికే 75 శాతానికి పైగా సినిమా షూటింగ్‌ జరిగిపోయింది. ప్రస్తుతం క్లైమాక్స్‌ సన్నివేశాల చిత్రీకరణలో 'ఆర్‌ఆర్‌ఆర్‌' టీమ్‌ బిజీగా ఉందని తెలుస్తోంది. షూటింగ్‌ కంప్లీట్‌ చేసి, విఎఫ్‌ఎక్స్‌ పనులపై దృష్టి సారించనున్నారట జక్కన్న అండ్‌ టీమ్‌.
