రకుల్‌ ప్రీత్‌ సింగ్‌ తెలుగులో స్టార్‌ హీరోయిన్‌. ఆమెకు క్షణం కూడా తీరిక లేకుండా తెలుగులో చేతి నిండా సినిమాలున్నాయి. ఇదే తరుణంలో అమ్మడు తమిళంలో కూడా బిజీ కావాలనుకుంటోంది. ఆల్రెడీ తమిళంలో ఓ సినిమా చేసింది గతంలో రకుల్‌ ప్రీత్‌ సింగ్‌. అయితే ఆ సినిమా అంతగా గుర్తింపు పొందలేదు. తాజా సినిమా మణిరత్నం దర్శకత్వంలో తెరకెక్కబోతోంది. ఈ సినిమాలో కార్తీ హీరో. ఈ సినిమా ద్వారా కార్తీతో తొలిసారిగా జత కడుతోన్న రకుల్‌ తమిళంలోకి గ్రాండ్‌గా రీ ఎంట్రీ ఇస్తోంది. ఇప్పుడు తెలుగులో ఆమెకున్న క్రేజ్‌తో తమిళంలో కూడా దూసుకెళ్లే అవకాశాలున్నాయని సినీ ప్రముఖుల సమాచారమ్‌. అందులోనూ కార్తీ - మణిరత్నం కాంబినేషన్‌ అంటే భారీ అంచనాలున్నాయి. మొదట్లో ఈ సినిమాలో కార్తీకి జోడీగా 'ప్రేమమ్‌' బ్యూటీ సాయి పల్లవిని అనుకున్నారు. వేరే కారణాలతో ఆమె ఈ సినిమా నుండి తప్పుకోగా, ఆ ప్లేస్‌లోకి రకుల్‌ వచ్చి చేరింది. ఈ సినిమా తమిళంలో రకుల్‌కి మంచి పేరు తెచ్చి పెడుతుందంటున్నారు. అలాగే మురుగదాస్‌ - మహేష్ కాంబోలో తెరకెక్కుతోన్న 'సంభవామి' సినిమా తెలుగుతో పాటు తమిళంలో కూడా విడుదలవతోంది. ఈ సినిమాలో కూడా రకులే హీరోయిన్‌. 'సంభవామి' టైటిల్‌తో వస్తోన్న ఈ సినిమా భారీ బడ్జెట్ మూవీగా, భారీ అంచనాలతో విడుదలవుతోంది. ఇలా వరుసగా రెండు సినిమాలతో ముద్దుగుమ్మ రకుల్‌ ప్రీత్‌ సింగ్‌ తమిళ ప్రేక్షకులను ఆకట్టుకోనుందన్న మాట. మరో పక్క తెలుగులో సాయి ధరమ్‌తో 'విన్నర్‌' సినిమాలోనూ, బెల్లంకొండ శ్రీనివాస్‌తో మరో సినిమాలోనూ నటిస్తోంది రకుల్‌ ప్రీత్‌ సింగ్‌.
