ఈమధ్య టాలీవుడ్ లో బాలీవుడ్ భామల హవా ఎక్కువైందనే చెప్పాలి. 'RRR' లో అలియా భట్ నటిస్తుంటే, ప్రభాస్ కొత్త సినిమా కోసం దీపికా పదుకొనే ను ఎంపిక చేశారు. విజయ్ దేవరకొండ కొత్త సినిమాలో అనన్య పాండే హీరోయిన్ గా నటిస్తోంది.ఈ సినిమాలే కాకుండా పలు ఇతర సినిమాల్లో కూడా బాలీవుడ్ హీరోయిన్లను పరిశీలిస్తున్నారని సమాచారం. మెగా హీరో వరుణ్ తేజ్ నటిస్తున్న నెక్స్ట్ సినిమాలో బాలీవుడ్ భామ సాయి మంజ్రేకర్ పేరును పరిశీలిస్తున్నారట.
సల్మాన్ ఖాన్ నటించిన 'దబాంగ్ 3' ఈ సినిమాతో హీరోయిన్ గా బాలీవుడ్ పరిచయమైంది సాయి మంజ్రేకర్. ప్రముఖ దర్శకుడు, నటుడు అయిన మహేష్ మంజ్రేకర్ కూతురే ఈ సాయి మంజ్రేకర్. మొదటి సినిమాతోనే ఫిలిం మేకర్ల దృష్టిని ఆకర్షించిన సాయికి మంచి ఆఫర్లు వస్తున్నాయట. పొడవైన అమ్మాయి కావడంతో వరుణ్ తేజ్ కు జోడిగా బాగుంటుందనే ఉద్దేశంతో ఈ అమ్మాయిని పరిశీలిస్తున్నారట. సాయి మంజ్రేకర్ దాదాపుగా ఖరారు అయిందని, త్వరలోనే దీనికి సంబంధించిన అధికారిక ప్రకటన కూడా రానుందని అంటున్నారు.
నూతన దర్శకుడు కిరణ్ కొర్రపాటి రూపొందిస్తున్న ఈ సినిమా ఇప్పటివరకు ఒక షెడ్యూల్ పూర్తి చేసుకుంది. కరోనా క్రైసిస్ కారణంగా ఈ సినిమా షూటింగ్ కు అంతరాయం ఏర్పడింది. పరిస్థితులు చక్కబడిన తర్వాత కొత్త షెడ్యూల్ ప్రారంభిస్తారు. ఈ సినిమాను అల్లు అరవింద్ పెద్ద కుమారుడు బాబి, సిద్దు ముద్దా కలిసి నిర్మిస్తున్నారు.
