స్టార్ హీరోలు అనగానే అద్దాల మేడల్లో ఉంటారని, కాలికి మట్టి అంటదని అందరికీ అభిప్రాయం ఉంటుంది. ఓ రకంగా అది నిజమని చెప్పుకోవచ్చు. అయితే కొందరు స్టార్ హీరోలు మాత్రం అందుకు భిన్నంగా ప్రవర్తిస్తుంటారు. ఈ మధ్య బాలీవుడ్ కండల వీరుడు సల్మాన్ ఖాన్ రైతు అవతారం ఎత్తారు. ఓ నాలుగు రోజుల క్రితం ఒంటికి మట్టి పూసుకొని ఫోటోకి పోజు ఇచ్చారు. అయితే ఈ ఫోటో కు మిశ్రమ స్పందన దక్కింది. ఫోటో కోసం చేసిన స్టంట్ అంటూ కొందరు విమర్శలకు కూడా దిగారు.
కరెక్ట్ గా రెండు రోజుల తర్వాత సల్మాన్ తన ఇన్స్టాగ్రామ్ ఖాతా ద్వారా మరో వీడియో షేర్ చేశారు. ఈ వీడియోలో సల్మాన్ తన పొలంలో వరి నాట్లు వేస్తూ అచ్చమైన రైతు తరహాలో చెమటలు చిందించారు. అయితే రైతు లాగా దుస్తులు మాత్రం వేసుకోలేదు. ఒక టీ షర్ట్ - డెనిమ్ షార్ట్ వేసుకుని ఆధునికంగానే కనిపించారు. కానీ రైతు పాత్రలో ఒదిగిపోయారు. సల్మాన్ ఖాన్ కు ముంబై శివార్లలోని పన్వేల్ ప్రాంతంలో ఓ వ్యవసాయ క్షేత్రం ఉంది. ప్రస్తుతం లాక్ డౌన్ కారణంగా షూటింగులకు అంతరాయం కలగడంతో తో తన కుటుంబంతో పాటు అక్కడే ఉంటున్నారు. పనిలో పనిగా వ్యవసాయం పై మక్కువతో ఇలా రైతు అవతారమెత్తారని అంటున్నారు.
ఈ వీడియో చూస్తుంటే నిజంగానే సల్మాన్ వ్యవసాయం చేస్తూ అందులోని కష్టసుఖాలను ఆస్వాదిస్తున్నాడు అనే విషయం మనకు అర్థమవుతుంది. వెలుగు జిలుగుల బాలీవుడ్ తారలు ఈ విధంగా రైతులా ఉండడం నిజంగానే ఎంతో మందికి స్ఫూర్తినిస్తుందనడంలో సందేహం లేదు.
