లేడీ సూపర్‌స్టార్‌ అనిపించుకోవడానికి అడుగు దూరంలో నిలిచింది అక్కినేని కోడలు సమంత. వరుసగా హిట్లు మీద హిట్లు కొడుతోన్న సమంత పేరు టాలీవుడ్‌లో మార్మోగిపోతోంది. నాగార్జున హీరోగా రూపొందుతోన్న 'మన్మధుడు 2'లో స్పెషల్‌ రోల్‌ చేస్తున్న సమంత ఆ సినిమాకి అప్పుడే బోలెడంత వెయిట్‌ తీసుకొచ్చేసింది. కింగ్‌ నాగార్జున హీరోగా నటిస్తున్నా, రకుల్‌ ప్రీత్‌సింగ్‌ హీరోయిన్‌గా చేస్తున్నా, ఈ రెండింటికీ మించి సమంత ఫ్యాక్టర్‌ ఈ సినిమాకి పాజిటివ్‌ కళ అప్పుడే తీసుకొచ్చేసింది.
మరోపక్క 'ఓ బేబీ' సినిమాపై అంచనాలు ఆకాశాన్ని అంటేస్తున్నాయి. ఇవి కాక '96' రీమేక్‌లో నటిస్తోంది సమంత. పెళ్లయ్యాక కెరీర్‌ని ఇంకా స్పెషల్‌గా డిజైన్‌ చేసుకుంటోంది సమంత. నయనతారలా సూపర్‌స్టార్‌డమ్‌ తెచ్చుకోవాలంటే, సోలో హీరోయిన్‌గా బాక్సాఫీస్‌ని శాసించే నిఖార్సయిన హిట్టు సమంతకు పడాల్సి ఉంది. బహుశా 'ఓ బేబీ' సినిమాతో సమంత ఆ ఘనతను సాధిస్తుందేమో వేచి చూడాలిక. త్వరలో ఈ సినిమా రిలీజ్‌కి ముస్తాబవుతోంది. ఈ ఏడాది ఇప్పటికే 'మజిలీ'తో సూపర్‌ హిట్‌ కొట్టేసింది సమంత.
