సంక్రాంతి సెలవులు ముగిశాయి.. థియేటర్లలో ఇప్పటికే రెండు పెద్ద సినిమాలు ఓ రేంజ్‌లో సందడి చేశాయి.. చేస్తూనే వున్నాయి. మధ్యలో చిన్న సినిమా 'ఎంత మంచివాడవురా' నలిగిపోయిందనుకోండి.. అది వేరే విషయం. సంక్రాంతి సెలవులు ముగిశాక పెద్ద సినిమాల వసూళ్ళు ఎలా వుండబోతున్నాయి? ఈ వీకెండ్‌ వరకూ అవి ఎలా నిలదొక్కుకుంటాయి? అన్న చర్చ సర్వత్రా జరుగుతోంది. 'సరిలేరు నీకెవ్వరు', 'అల వైకుంఠపురములో' చిత్రాలు రెండూ బాక్సాఫీస్‌ వద్ద మంచి విజయాల్ని నమోదు చేశాయి. అయితే, 'అల వైకుంఠపురములో' ఇంకాస్త పెద్ద విజయాన్ని నమోదు చేసింది.
ఇప్పటిదాకా సెలవుల సీజన్‌ గనుక.. వసూళ్ళు హోరెత్తాయి. సోమవారం.. అంటే, ఈ రోజు అసలు సిసలు పరీక్ష ఎదురవనుంది రెండు సినిమాలకీ. తాజా స్టేటస్‌ని చూస్తే 'అల వైకుంఠపురములో' సినిమాకి కొంత ఎడ్జ్‌ కన్పిస్తోంది. 'సరిలేరు నీకెవ్వరు' కాస్త డల్‌గా ఓపెన్‌ అయినట్లు తెలుస్తోంది చాలా చోట్ల. మధ్యాహ్నం.. అంటే మ్యాటినీకి కూడా పరిస్థితి ఇలాగే వుండొచ్చు. ఫస్ట్‌ షోకి వసూళ్ళు పుంజుకుంటాయని అంచనా వేస్తున్నారు.
మరోపక్క, తమ సినిమాల్ని కొత్తగా ప్రమోట్‌ చేయడానికి ఇప్పటికే 'అల వైకుంఠపురములో', 'సరిలేరు నీకెవ్వరు' టీమ్స్‌ తమ తమ ప్రయత్నాల్లో బిజీగా వున్నాయి. నిన్ననే 'అల వైకుంఠపురములో' సక్సెస్‌ ఈవెంట్‌ని విశాఖలో నిర్వహించిన విషయం విదితమే. కాగా, మహేష్‌బాబు తన కుటుంబ సభ్యులతో కలిసి హాలీడే ట్రిప్‌ కోసం విదేశాలకు వెళ్ళినట్లు తెలుస్తోంది.
