హీరోగా మారిన కమెడియన్‌ షకలక శంకర్‌ రెండో సినిమా షురూ చేశాడు. తాజాగా ఆ సినిమా పోస్టర్‌ విడుదలైంది. 'కేడీ నెం 1' టైటిల్‌తో రూపొందుతోన్న ఈ సినిమా పోస్టర్‌లో షకలక శంకర్‌ సిక్స్‌ ప్యాక్‌ బాడీతో స్లిమ్‌ అండ్‌ హ్యాండ్‌సమ్‌గా కనిపిస్తున్నాడు. పోస్టర్‌ అయితే అదిరింది. జానీ డైరెక్షన్‌లో ఈ సినిమా రూపొందుతోంది. గిరీష్‌బాబు నిర్మాతగా వ్యవహరిస్తున్నారు. అజయ్‌ పట్నాయక్‌ సంగీతం అందిస్తున్నారు. 

కాగా హీరోగా తొలి సినిమా 'శంభో శంకర' పరాజయం పాలైనా, మాస్‌లో ఇంప్రెషన్‌ గట్టిగానే వేశాడు షకలక శంకర్‌. కానీ తాజా సినిమాతో కమర్షియల్‌గా సూపర్‌ సక్సెస్‌ అందుకుంటానంటున్నాడు ఈ జబర్‌దస్త్‌ కమెడియన్‌. కమెడియన్‌గా తనదైన ముద్ర వేశాడు. హీరోగానూ టాలెంట్‌ ఏంటో చూపించాలనుకుంటున్నాడు.

తొలి సినిమా 'శంభో శంకర'లో పవన్‌ కళ్యాణ్‌ని దించేశాడు. ప్రోమోస్‌లో అచ్చు పవన్‌ కళ్యాణ్‌ స్టైల్‌ని ఇమిటేట్‌ చేశాడు. ఫ్రేమ్‌ టు ఫ్రేమ్‌ పవన్‌ని తలపించాడు. ఈ సారి మెగాస్టార్‌ చిరంజీవిని దించేశాడు. పోస్టర్‌లో అచ్చు మెగాస్టార్‌లా కనిపిస్తున్నాడు షకలక శంకర్‌. 

మెగా కుటుంబానికి వీరాభిమాని అయిన షకలక శంకర్‌కి పవన్‌ కళ్యాణ్‌ స్టైల్‌ అంతగా కలిసి రాలేదు. కానీ చిరంజీవి స్టైల్‌ అయినా కలిసొస్తుందేమో చూడాలిక.