అందం, అభినయంతో ఆకట్టుకుంది, తొలి సినిమాతోనే రికార్డు విజయం అందుకుంది ముద్దుగుమ్మ షాలినీ పాండే. ఈ సినిమా తర్వాత అమ్మడి పేరు మార్మోగిపోయింది. తెలుగు సంగతి పక్కన పెడితే, కోలీవుడ్‌ నుండి వరుస ఆఫర్లు వెల్లువెత్తుతున్నాయి ఈ బ్యూటీకి. 

ఇప్పటికే '100 పర్సెంట్‌ కాదల్‌' సినిమాలో హీరోయిన్‌గా బంపర్‌ ఛాన్స్‌ కొట్టేసింది. తెలుగులో తమన్నా, నాగ చైతన్య జంటగా వచ్చిన సూపర్‌ హిట్‌ సినిమా '100 పర్సెంట్‌ లవ్‌'కి రీమేక్‌గా తెరకెక్కుతోందీ సినిమా. ఎ.ఆర్‌. రెహమాన్‌ మేనల్లుడు జి.వి.ప్రకాష్‌ ఈ సినిమాలో షాలినీ పాండేతో జత కడుతున్నాడు. తాజాగా ఈ బ్యూటీ మరో అద్భుతమైన అవకాశాన్ని అంది పుచ్చుకుంది. 

తమిళంలో జీవా హీరోగా తెరకెక్కుతోన్న ఓ సినిమాకి ఈ ముద్దుగుమ్మ హీరోయిన్‌గా ఎంపికైంది. ఇదో కామెడీ థ్రిల్లర్‌ సినిమా. ఈ తరహా సినిమాలకు ప్రస్తుతం మంచి ఆదరణ లభిస్తోంది. టాలీవుడ్‌ అయినా, కోలీవుడ్‌ అయినా కామెడీ హారర్‌ జోనర్స్‌ హవా కొనసాగుతున్న ఈ తరుణంలో షాలినీ పాండేకి ఈ సినిమాలో ఛాన్స్‌ దక్కడం కలిసొచ్చే అంశమే అని చెప్పాలి. ఈ సినిమాలో షాలినీ పాండే క్యారెక్టర్‌ కొత్తగా ఉండబోతోందట. హీరో జీవాకి ఇది 29వ సినిమా కావడం విశేషం. డాన్‌ శాండీ ఈ సినిమాకి దర్శకత్వం వహిస్తున్నారు. 

ఇక తెలుగు విషయానికి వస్తే తెలుగులో కీర్తి సురేష్‌ ప్రధాన పాత్రలో తెరకెక్కుతోన్న 'మహానటి' సినిమాలో ఈ ముద్దుగుమ్మ నటిస్తోంది. మహానటి సావిత్రి జీవితాధారంగా తెరకెక్కుతోన్న సినిమా ఇది. అలా 'అర్జున్‌రెడ్డి' సినిమాతో ఎంట్రీ ఇచ్చి, సూపర్‌ హిట్‌ కొట్టిన ఈ బ్యూటీ ఇటు కోలీవుడ్‌లోనూ, టాలీవుడ్‌లోనూ ఎట్‌ ఏ టైం బిజీగా గడుపుతూ, సత్తా చాటుతోంది.