'అందాల రాక్షసి', 'కృష్ణగాడి వీర ప్రేమగాధ' వంటి హిట్‌ సినిమాలు తీసిన యంగ్‌ డైరెక్టర్‌ హను రాఘవపూడి, అనూహ్యంగా 'లై' సినిమాతో బోర్లా పడ్డాడు. భారీ అంచనాలతో తెరకెక్కిన ఈ సినిమా ఆశించినంత ఫలితాన్ని ఇవ్వలేకపోయింది. ఇప్పుడు శర్వానంద్‌ సినిమాతో బౌన్స్‌ బ్యాక్‌ అవుతానంటున్నాడు. ఈ సినిమా టైటిల్‌ని అఫీషియల్‌గా రిలీజ్‌ చేసింది చిత్ర యూనిట్‌. 'పడి పడి లేచె మనసు' అనే టైటిల్‌ని ఈ సినిమాకి ఫిక్స్‌ చేశారు.
వరుస హిట్స్‌తో దూకుడు మీదున్న హీరో శర్వానంద్‌. ఈ సారి శర్వానంద్‌ లక్‌ హనుకి కూడా చిక్కనుందనిపిస్తోంది. టైటిల్‌తో పాటు పోస్టర్‌ కూడా విడుదల చేశారు. ఆ పోస్టర్‌లో శర్వానంద్‌ చేతిలో భంగు కుండ పట్టుకుని కూర్చున్నాడు. నేచురల్‌ లుక్‌లో కనిపిస్తున్నాడు శర్వానంద్‌. బ్యాక్‌ గ్రౌండ్‌ కలర్‌ వగైరా కొన్ని కొన్ని అంశాలు 'లై లో ఉన్నట్లుగానే కనిపిస్తున్నాయి. 'శతమానం భవతి' సినిమా తర్వాత శర్వానంద్‌ చేస్తున్న సినిమా ఇది. టైటిల్‌ చూస్తే వెరీ వెరీ ఇంట్రెస్టింగ్‌గా అనిపిస్తోంది. క్యూట్‌ రొమాంటిక్‌ లవ్‌ స్టోరీని తలపిస్తోందీ టైటిల్‌.
లవ్‌ స్టోరీసే అయినా కానీ హను రాఘవపూడిని తక్కువగా అంచనా వేయలేం. అందులోనే ఏదో మ్యాజిక్‌ చేసి చూపిస్తాడు. ఇప్పుడు శర్వాతో హను చేయబోయే మ్యాజిక్‌ ఎలా ఉండబోతోందో చూడాలి మరి. ఈ సినిమాలో లక్కీ అండ్‌ టాలెంటెడ్‌ బ్యూటీ సాయి పల్లవి హీరోయిన్‌గా నటిస్తోంది.
