వేశ్య పాత్రల్లో ఇప్పటికే చాలా మంది హీరోయిన్లు నటించి మెప్పించారు. ఆ సినిమాల విజయాల సంగతి పక్కన పెడితే, స్టార్‌ హీరోయిన్లు కూడా వేశ్య పాత్రల్లో నటించడం గొప్ప విషయంగా చెప్పొచ్చు. తెలుగులో అనుష్క, ఛార్మి, శ్రియ తదితర నటీమణులు వేశ్య పాత్రల్లో నటించి పాత్ర పరంగా విశేషంగా ఆకట్టుకున్నారు. బాలీవుడ్‌లోనూ విద్యాబాలన్‌ తదితర హీరోయిన్లు ఈ పాత్రలతో మెప్పించారు. కాగా తాజాగా మలయాళంలో ఇదే కాన్సెప్ట్‌ మీద ఓ సినిమా తెరకెక్కుతోంది. ఆ సినిమాలో వేశ్య పాత్రలో నటిస్తున్నది అచ్చమైన పదహారణాల తెలుగమ్మాయి..శోభితా ధూళిపాళ్ల. ఈ ముద్దుగుమ్మ తాజాగా ఈ మలయాళ సినిమాకి సైన్‌ చేసింది. 'మూథోన్‌' టైటిల్‌తో తెరకెక్కుతోన్న ఈ సినిమా మలయాళంతో పాటు హిందీలో కూడా రూపొందుతోంది. ఈ సినిమా కోసమే అమ్మడు వేశ్యగా అవతారమెత్తింది. అయితే ఈ సినిమా ప్రత్యేకత ఏంటంటే ముంబయ్‌లో అత్యంత పాపులర్‌ అయిన రెడ్‌ లైట్‌ ఏరియా 'కామాటిపుర'లో ఈ సినిమాని చిత్రీకరించనున్నారట. ఇక్కడ సీన్స్‌ని చాలా హృద్యంగా తెరకెక్కించనున్నారట. ఇంతవరకూ ఈ తరహాలో చాలా చిత్రాలే తెరకెక్కినప్పటికీ, ఈ సినిమా వాటిన్నంట్లోనూ ప్రత్యేకం అంటోంది చిత్ర యూనిట్‌. గీతూ మోహన్‌దాస్‌ ఈ సినిమాకి దర్శకత్వం వహిస్తున్నారు. నవీన్‌ పాళి హీరోగా నటిస్తున్నాడు. కాగా అమ్మడు తెలుగులోనూ ఓ సినిమాలో నటిస్తోంది. అడవిశేష్‌ హీరోగా తెరకెక్కుతోన్న ఆ సినిమా టైటిల్‌'గూఢచారి'. సస్పెన్స్‌ థ్రిల్లర్‌గా ఈ సినిమా తెరకెక్కుతోంది. రెండు సినిమాలు శోభితాకి డిఫరెంట్‌ జోనర్‌ మూవీసే. చూడాలి అమ్మడు ఎక్కడ ఎంత ఎక్కువ పాపులర్‌ అవుతుందో. నటిగా ఎంత మంచి గుర్తింపు తెచ్చుకుంటుందో!
