నేచురల్‌ స్టార్‌ నాని హీరోగా నటించిన 'జెర్సీ' సినిమాతో తెలుగు ప్రేక్షకులకు దగ్గరైన ముద్దుగుమ్మ శ్రద్ధా శ్రీనాధ్‌ని మర్చిపోలేదు కదా! ఎందుకు మర్చిపోతారులే.. అంతగా చెప్పింది కదా.. నా పేరు శ్రద్ధా శ్రీనాధ్‌.. నేను 'జెర్సీ' సినిమాలో హీరోయిన్‌ని.. అంటూ మర్చిపోయే ప్రశక్తే లేదు. ఆ తర్వాత 'జోడీ' సినిమాతో వచ్చింది కానీ, ఆ సినిమా ఆశించిన రిజల్ట్‌ అందించలేదు. సో తెలుగులో శ్రద్ధా శ్రీనాథ్‌ అంటే గుర్తొచ్చే సినిమా 'జెర్సీ'నే. ఈ సంగతి అటుంచితే, ఈ టాలెంటెడ్‌ పాపకి తాజాగా మరో బంపర్‌ ఛాన్స్‌ దక్కిందట. నందమూరి నటసింహం బాలయ్య సినిమాలో హీరోయిన్‌గా శ్రద్ధా శ్రీనాధ్‌ ఎంపికైందట. బాలయ్య ప్రస్తుతం 'రూలర్‌' సినిమాలో నటిస్తున్నారు. కె.ఎస్‌.రవికుమార్‌ ఈ సినిమాకి దర్శకుడు. దాదాపు చివరి దశకు చేరుకున్న ఈ సినిమా ఈ ఏడాది డిశంబర్‌లో రిలీజ్‌ కానుంది. ఈ సినిమాలో వేదిక, సోనాల్‌ చౌహాన్‌ ఈ సినిమాలో బాలయ్య సరసన నటిస్తున్నారు. ఈ సినిమా తర్వాత బాలయ్య - బోయపాటి శీను కాంబినేషన్‌లో ఓ సినిమా ఎప్పుడో ఫిక్సయిపోయింది. ఈ సినిమా కోసమే మన 'జెర్సీ' భామ హీరోయిన్‌గా రాబోతోంది. గ్లామర్‌ కన్నా, యాక్టింగ్‌కే ఎక్కువ ప్రాధాన్యత ఇచ్చే శ్రద్ధా శ్రీనాధ్‌కి ఈ సినిమాలో మంచి పాత్రే దక్కిందని తెలుస్తోంది. 'లెజెండ్‌' మూవీలో రాధికా ఆప్టే తరహా పాత్రను పోలి ఉంటుందట ఆ పాత్ర. అత్యంత విశ్వసనీయ వర్గాల సమాచారం ప్రకారం సినిమా కూడా అదే జోనర్‌లో ఉండనుందని తెలుస్తోంది.