చిత్ర‌సీమ‌లో ప‌రిస్థితులు బాగోలేవు.... జ‌నాలు థియేట‌ర్ల‌కు రావ‌డం లేదు.. అనే మాట‌లు ఓ ప‌క్క వినిపిస్తున్నాయి. మ‌రో వైపు ప్ర‌తీవారం జోరుగా సినిమాలు వ‌స్తూనే ఉన్నాయి. ఈవారం కూడా రెండు సినిమాలు బాక్సాఫీసుని ఢీ కొట్ట‌బోతున్నాయి. ఒక‌టి సీతారామం అయితే.. రెండోది బింబిసార. ఈ రెండు చిత్రాలూ ఆగ‌స్టు 5నే ప్రేక్ష‌కుల ముందుకు వ‌స్తున్నాయి.
మ‌హాన‌టి సినిమాతో వైజ‌యంతీ మూవీస్ పునః వైభ‌వం సంపాదించింది. ఆ ఉత్సాహంతో తెర‌కెక్కించిన సినిమానే `సీతారామం`. టైటిల్ ద‌గ్గ‌ర్నుంచి ట్రైల‌ర్ వ‌ర‌కూ ఈ సినిమాపై అంతా పాజిటీవ్ బ‌జ్ న‌డుస్తోంది. ఈమ‌ధ్య కాలంలో ఇంత పాజిటీవ్ వైబ్రేష‌న్స్ ఉన్న సినిమా మ‌రోటి లేద‌న‌డంలో ఎలాంటి అతిశ‌యోక్తీ లేదు. విడుదలైన పాట‌లు క్లాస్ ట‌చ్‌తో శ్రోత‌ల్ని విప‌రీతంగా ఆక‌ట్టుకుంటున్నాయి. ట్రైల‌ర్ ఇప్పుడు టాక్ ఆఫ్ ది టౌన్ అయ్యింది. ఈ సినిమాని థియేట‌ర్ల‌లోనే చూడాల‌న్న ఉత్సుక‌త‌ని క‌లిగించింది. పైగా ఈ సినిమాలో ఉన్న కాస్టింగ్‌... సినీ ప్రియుల్ని అబ్బుర ప‌రుస్తోంది. దుల్క‌ర్ స‌ల్మాన్‌, ర‌ష్మిక, మృణాళ్ ఠాకూర్‌, సుమంత్‌, త‌రుణ్ భాస్క‌ర్‌, భూమిక... ఇలా అంద‌రూ పేరున్న వాళ్లే. ఈ సినిమాకి నిర్మాత‌లు ఇస్తున్న ప్ర‌మోష‌న్లు కూడా ఓ రేంజ్‌లో ఉన్నాయి. యూత్‌,ఫ్యామిలీ మొత్తం ఈ సినిమా చూడాల‌న్న ఉత్సాహాన్ని క‌న‌బ‌రుస్తోంది. వాళ్ల ఓటు.. ఈ సినిమాకే.
మ‌రోవైపు బింబిసార కూడా త‌న అదృష్టాన్ని ఆగ‌స్టు 5నే ప‌రీక్షించుకోబోతోంది. క‌ల్యాణ్ రామ్ క‌థానాయ‌కుడిగా రెండు డిఫ‌రెంట్ షేడ్స్‌లో న‌టించిన ఈ సినిమా కూడా భారీ బ‌డ్జెట్ తో రూపుదిద్దుకుంది. కుటుంబ ప్రేక్ష‌కులు, క్లాస్ ఆడియ‌న్స్‌... సీతారామంకి ఓటేస్తే... మాస్ మాత్రం బింబిసార వైపు మొగ్గు చూపించ‌వ‌చ్చు. అయితే సీతారామంతో పోలిస్తే.. బింబిసార ప్ర‌మోష‌న్ల హ‌డావుడి కాస్త త‌క్కువ‌గానే క‌నిపిస్తోంది. `బింబిసార` ఏమాత్రం అటూ ఇటూ అయినా.. మాస్ జ‌నాలు సైతం `సీతారామం` థియేట‌ర్ల వైపు న‌డిచే ఆస్కారం ఉంది. ఏది ఏమైనా ఆగ‌స్టు 5న ఈ రెండు చిత్రాల మ‌ధ్య గ‌ట్టి పోటీ ఉంద‌నేది వాస్త‌వం. మ‌రి.... వీటిలో గెలుపు ఎవ‌రిదో ప్రేక్ష‌కులే చెప్పాలి.
