గూఢచారి సినిమాతో టాలీవుడ్ కి పరిచయమైన తెలుగమ్మాయి శోభితా ధూళిపాళ్లకు ముంబై హొటల్లో చేదు అనుభవం ఎదురైంది. గతంలో సైకో రామన్ వంటి చిత్రాల్లో నటించిన శోభితా ప్రస్తుతం ఓ హిందీ మూవీలో నటిస్తుంది. శోభితా ఓ ముస్లిమ్ అమ్మాయి పాత్రలో కనిపించబోతున్న ఈ సినిమా షూటింగ్ ముంబైలో జరుగుతుంది. ఆ తరుణంలో షూటింగ్ పూర్తయ్యాక ఆ పాత్రకి ధరించిన దుస్తులతోనే హోటల్ కి వెళ్లిన తను.. ఓ బాధాకరమైన సంఘటన ఎదుర్కొన్నానని ట్విట్టర్ ద్వారా తెలియచేసింది.
తన కోసం ఆ హోటల్లో రూమ్ బుక్ చేసారని, ఆ రూమ్ తాలూకు తాళాలు ఇవ్వమని అడిగితే రిసెప్షనిస్ట్ ఇవ్వకుండా చాలా కఠినంగా ప్రవర్తించాడని పేర్కొంది. 'నేను హీరోయిన్ అని అక్కడున్న వ్యక్తికి తెలీదు. ఆ సమయంలో నేను బురఖాలో ఉన్నాను, నా బ్యాగ్ కూడా దుమ్ము ధూళితో నిండుకుని ఉంది. అందువల్లే అతను నాకు కీస్ ఇవ్వలేదు.
చుట్టూ చాలా మంది జనాలు చూస్తున్నా సరే అతను అనుచితంగా ప్రవర్తించటం చాలా బాధాకరమైన విషయం. నేను తలచుకుంటే ఆ వ్యక్తితో క్షమాపణ చెప్పించుకోగలను. కానీ నేను ఏమి అనకుండా అక్కడినుంచి వెళ్ళిపోయాను. నన్ను ఒక ముస్లిం యువతిగా భావించి కొద్ది నిముషాలు అలా ప్రవర్తించినందుకు నాకే ఇలా ఉంటే, మిగిలిన వారి పరిస్థితి ఏంటో ఆలోచించండి' అంటూ తన ఆవేదనని వ్యక్తపరిచింది.
