'అమ్మా బొమ్మాళీ పిందె పండయ్యిందే..' అంటూ 'అరుంధతి' సినిమాలో పశుపతి పాత్ర ఎంత పాపులర్‌ అయ్యిందో ప్రత్యేకంగా చెప్పక్కర్లేదు. అదో ట్రెండ్‌ అయిపోయింది ఆ టైంలో. సోనూసూద్‌ పోషించిన ఆ పాత్ర ఆయనకు విలన్‌ కేటగిరిలో మంచి గుర్తింపు తెచ్చిపెట్టింది. ఆ తర్వాత చాలా కాలం పాటు పశుపతి అంటే సోనూసూద్‌, సోనూసూద్‌ అంటే పశుపతి అనేంతలా ఆ పాత్ర తాలూకు మార్క్‌ పడిపోయింది. అయితే తాజాగా సోనూసూద్‌ మరోసారి ఆ తరహా పాత్రలో అలరించబోతున్నాడనీ తెలుస్తోంది.
ఏ సినిమా కోసమంటారా.? తేజ తెరకెక్కిస్తున్న 'సీత' సినిమా కోసం. ఈ సినిమాలో విలన్‌ పాత్ర అత్యంత కీలకమని తెలుస్తోంది. మామూలుగానే తేజ సినిమాల్లో విలన్‌ పాత్రలు ప్రత్యేకంగా అతి క్రూరంగా డిజైన్‌ చేయబడతాయి. ఈ సినిమాలో విలన్‌ పాత్ర కోసం మరింత ప్రత్యేక జాగ్రత్త తీసుకున్నాడనీ తెలుస్తోంది. ఎంత జాగ్రత్త అంటే, హీరో పాత్ర కన్నా విలన్‌ పాత్రే ఎక్కువ ఎలివేట్‌ అయ్యేంతలా అట. బెల్లంకొండ శ్రీనివాస్‌, కాజల్‌ అగర్వాల్‌ జంటగా తెరకెక్కుతోన్న ఈ చిత్రంలో కాజల్‌ సీత పాత్ర పోషిస్తోంది.
సీత అంటే మనకి ఓ ఐడియా ఉంది. కానీ మన ఐడియాలకి అందే సీత కాదీ సీత. సీత అంటే ఓర్పుకు కేరాఫ్‌ ఆడ్రస్‌. కష్టనష్టాలు ఆమె జీవితంతో సర్వ సాధారణం. కానీ తేజ సీత మాత్రం కష్టాలు పెట్టేదే కానీ, పడేది కాదట. అంత స్ట్రాంగ్‌గా ఈ క్యారెక్టర్‌ని డిజైన్‌ చేశాడట తేజ. ఈ పాత్ర కోసం కాజల్‌ తన ఆటిట్యూడ్‌లో చాలా చాలా మార్పులు చేసుకుంటోందట. తన కెరీర్‌లోనే 'సీత' వెరీ స్పెషల్‌ మూవీ అవుతుందని కాజల్‌ భావిస్తోందట.
