'అఖిల్‌' సినిమాతో నిరాశపరిచి, రీ లాంచింగ్‌ అంటూ 'హలో' సినిమాతో రెండో సారి ఫ్రెష్‌గా హలో చెప్పి తెరంగేట్రం చేశాడు అక్కినేని అందగాడు అఖిల్‌. అయితే దురదృష్టవశాత్తూ రెండో సినిమా కూడా నిరాశపరచడంతో, ముచ్చటగా మూడో సినిమాని పట్టాలెక్కించేందుకు చాలా గ్యాప్‌ తీసుకున్నాడు. ఎట్టకేలకు అఖిల్‌ మూడో సినిమా పట్టాలెక్కినట్లే. 

ఇటీవల మెగా ప్రిన్స్‌ వరుణ్‌తేజ్‌తో 'తొలిప్రేమ' సినిమా తెరకెక్కించిన యంగ్‌ దర్శకుడు వెంకీ అట్లూరితో అఖిల్‌ సినిమా కన్‌ఫామ్‌ చేశాడు. అఖిల్‌ కోసం వెంకీ ఓ రొమాంటిక్‌ చిత్రాన్ని రూపొందించబోతున్నాడు. ఈ సినిమాలో పెద్దగా ప్రయోగాలేమీ చేయనంటున్నాడు అఖిల్‌. సాధారణ కమర్షియల్‌ మూవీగా నార్మల్‌ లవ్‌స్టోరీగా ఫుల్‌ లెంగ్త్‌ ఎంటర్‌టైనర్‌గా ఈ సినిమా తెరకెక్కబోతోందట. ఈ సినిమాలో స్పెషల్‌ సాంగ్‌ కోసం ఇప్పుడు చర్చ జరుగుతోంది. 

ఈ మధ్య స్పెషల్‌ సాంగ్స్‌కి స్టార్‌ హీరోయిన్స్‌ని తీసుకొచ్చి, సినిమాపై హైప్‌ క్రియేట్‌ చేస్తున్నారు. అందుకే అఖిల్‌ సినిమా కోసం కూడా ఓ ప్రముఖ హీరోయిన్‌తో సంప్రదింపులు జరుగుతున్నాయట. ఆ లిస్టులో కాజల్‌ అగర్వాల్‌, పూజా హెగ్దే పేర్లు వినిపిస్తున్నాయి. అయితే పూజా హెగ్దే ప్రస్తుతం ఖాళీగా లేదు. కాజల్‌ అయితే ఖాళీగానే ఉంది. ఆ కోవలో కాజల్‌కే ఎక్కువ అవకాశం ఉందని తెలుస్తోంది. మరో పక్క అఖిల్‌ తొలి సినిమాలో హీరోయిన్‌గా నటించిన ముద్దుగుమ్మ సాయేషా సైగల్‌ పేరు కూడా వినిపిస్తోంది. 

చూడాలి మరి, అఖిల్‌తో స్పెషల్‌ సాంగ్‌లో చిందేయబోయే ఆ క్రేజీ భామ ఎవరో.!