కాన్సెప్ట్‌ బేస్‌డ్‌ మూవీస్‌ అంటే, అబ్బో అవి క్లాస్‌ మూవీస్‌రా.. మన ఒంటికి పడవు.. అనుకుంటారు మాస్‌ ఆడియన్స్‌. అలా కాన్సెప్ట్‌ బేస్‌డ్‌ మూవీస్‌ అన్నీ క్లాస్‌ జోనర్‌లోకి వెళ్లిపోయాయి. కానీ, ఇప్పుడిప్పుడే ఆడియన్స్‌ ఆలోచనల్లో మార్పు వస్తోంది. మాస్‌ ఆడియన్స్‌నీ కొన్ని క్లాస్‌ మూవీస్‌ ఆకట్టుకుంటున్నాయి. ఈ మార్పు ఇంకా పెరగాలి.. అంటున్నాడు యంగ్‌ హీరో శ్రీ విష్ణు. ఆయన నటిస్తున్న చిత్రం 'తిప్పరా మీసం' ట్రైలర్‌ ప్రశంసలు అందుకుంటోంది.
ఈ సినిమా ప్రమోషన్స్‌లో భాగంగా కాన్సెప్ట్‌ బేస్‌డ్‌ మూవీస్‌ గురించి మాట్లాడుతూ, శ్రీవిష్ణు 'రంగస్థలం' సినిమా ప్రస్థావన తీసుకొచ్చాడు. విమర్శకుల ప్రశంసలు అందుకున్న 'రంగస్థలం' సినిమాని స్టార్‌ హీరో చేశాడు కాబట్టి, పిచ్చ పిచ్చగా విజయవంతం చేశారు. అదే నా లాంటి ఓ సాధారణ హీరో చేస్తే అంత తొందరగా ఎక్కదు.. కొంచెం టైమ్‌ పడుతుంది అన్నాడు శ్రీ విష్ణు. ఇక ఆయన నటించిన తాజా చిత్రం 'తిప్పరా మీసం' ట్రైలర్‌ చూస్తే, 'అర్జున్‌ రెడ్డి' ఫ్లేవర్‌ ఎక్కువగా కనిపిస్తోందనే టాక్‌ వినిపిస్తున్నా, సినిమాలో విషయం వేరే వుందంటున్నాడీ విలక్షణ నటుడు.
ఓ తల్లీ కొడుకుల కథ ఇది. అయితే, తల్లిని ద్వేషించే కొడుకుగా శ్రీ విష్ణు నటిస్తున్నాడు. పూర్తి నెగిటివ్‌ క్యారెక్టర్‌ అని ట్రైలర్‌ ద్వారా రివీల్‌ చేశారు. తాగుబోతు, తిరుగుబోతు అయిన ఓ కొడుకు తన తల్లి ప్రేమని ఎలా అర్ధం చేసుకున్నాడనేదే ఈ సినిమా కథ. రా లుక్స్‌తో శ్రీ విష్ణు ఆసక్తి పెంచుతున్నాడు. ఈ నెల్లోనే ఈ సినిమా ప్రేక్షకుల ముందుకు రానుంది.
