సినిమాని తెరపై చూశాక, అరరె ఈ సినిమాని ఇలా ఎందుకు తీశాడు? అని సగటు ప్రేక్షకుడు అనుకోవడం మామూలుగానే జరుగుతుంటుంది. ఎంతో అనుభవం ఉన్న దర్శకులు కూడా ఒక్కోసారి బోల్తా కొట్టేస్తారు. తెలుగు తెరకు సంచలనాలు అందించిన శ్రీనువైట్ల కూడా అంతే. 'ఆగడు', 'బ్రూస్‌లీ' లాంటి సినిమాలతో శ్రీను వైట్ల కెరీర్‌ కొంచెం నెమ్మదించింది. ఎందుకిలా? అనడిగితే, తెలిసి ఎవరూ తప్పులు చేయరు, కొన్ని కొన్ని సినిమాలకు అలా చిన్న చిన్న తప్పులు జరుగుతాయి, అవి కాస్ట్‌లీ మిస్టేక్స్‌గా మారతాయని సమాధానమిచ్చాడాయన. ముందే తెలిస్తే ఫ్లాప్‌ సినిమా తీసి, కెరీర్‌ని ఇబ్బందుల్లో పెట్టుకోడానికి ఏ దర్శకుడూ ఇష్టపడడు కదా? నేను కూడా అంతేనని అన్నాడాయన. 'మిస్టర్‌' సినిమా ఓ కొత్త కథతో తెరకెక్కిస్తున్నాడట. ఇంతకుముందు ఎప్పుడూ ఇలాంటి కథ తెలుగు తెరపై ఎవరూ చూడలేదని శ్రీనువైట్ల ఘంటాపథంగా చెబుతున్నాడు. 'మిస్టర్‌' సినిమాలో వరుణ్‌ తేజ హీరోగా నటిస్తున్నాడు. వరుణ్‌ సరసన అందాల భామలు హెబ్బా పటేల్‌, లావణ్య త్రిపాఠి తమ అందచందాలతో అలరించనున్న సంగతి తెలిసినదే. కామెడీ నుంచి యాక్షన్‌ వరకు, ఎమోషనల్‌ సీన్స్‌ నుంచి రొమాంటిక్‌ సీన్స్‌ వరకూ అంతా కొత్తగా ఉండేలా ప్లాన్‌ చేయడమే కాకుండా అనుకున్నది అనుకున్నట్టుగా తెరకెక్కించాడట. 'మిస్టర్‌' తర్వాతే తన తదుపరి సినిమాల వివరాలు వెల్లడిస్తానని ఆయన చెప్పాడు.