'ఎస్‌.ఎమ్‌.ఎస్‌' సినిమాతో హీరోగా తెరంగేట్రం చేశాడు సుధీర్‌బాబు. మహేష్‌బాబు బావగా కాకుండా, హీరోగా తనకంటూ ఓ స్పెషల్‌ పంథాని ఏర్పర్చుకున్నాడు. 'ప్రేమకథా చిత్రమ్‌' సినిమాతో హిట్‌ కొట్టి, 'భలే మంచి రోజు' అంటూ మరో హిట్‌నీ తన ఖాతాలో వేసుకున్నాడు. యంగ్‌ హీరోస్‌లో తనదైన శైలి నటనతో ఆకట్టుకుంటున్న సుధీర్‌ బాబు ఇప్పుడు కొత్త గెటప్‌ వేయబోతున్నాడు. నటనతో పాటు నిర్మాణ రంగంలోనూ అడుగులు వేయాలనుకుంటున్నాడు. ఈ మధ్యనే 'శమంతక మణి' అనే మల్టీస్టారర్‌ మూవీలో నటించిన సుధీర్‌ బాబు ఇప్పుడు తన కొత్త సినిమాకి తానే నిర్మాత కానున్నాడు. ఇప్పటికే చాలా మంది నటులు ఒక పక్క నటనతోనూ, మరో పక్క నిర్మాణం, దర్శకత్వం అంటూ ఇతరత్రా వ్యవహారాలను కూడా సక్సెస్‌ఫుల్‌గా చక్కబెడుతున్నారు. ఈ తరుణంలో తానేం తక్కువ కాదంటూ వచ్చేస్తున్నాడు సుధీర్‌ బాబు. ఓ కొత్త డైరెక్టర్‌ రాజశేఖర్‌ నాయుడు తెరకెక్కిస్తున్న చిత్రంలో సుధీర్‌ బాబు నటిస్తున్నాడు. ఆ సినిమాకే సుధీర్‌ నిర్మాతగా వ్యవహరించనున్నాడట. తన సినిమాతోనే తొలి నిర్మాణం చేయబోతున్నాడన్న మాట సుధీర్‌బాబు. అయితే నిర్మాతగా ఇతర హీరోల సినిమాలనూ తెరకెక్కిస్తాడో లేదో తెలీదు కానీ, ప్రస్తుతానికి తన సినిమాకి అయితే నిర్మాణ బాధ్యతలు స్వీకరించినట్లుగా టాలీవుడ్‌ వర్గాల సమాచారమ్‌. ఒకవేళ ఇది నిజమే అయితే సుధీర్‌ సాహసాన్ని మెచ్చుకొని తీరాల్సిందే. కొత్త డైరెక్టర్‌తో తెరకెక్కుతోన్న సినిమాకి తానే నిర్మాతగా మారుతున్నాడంటే కథపైనా, డైరెక్టర్‌ పైనా ఎంతో నమ్మకం ఉండాలి.