అక్కినేని మేనల్లుడు సుమంత్‌ హీరోగా 'ఇదం జగత్‌' చిత్రం తెరకెక్కుతోంది. లేటెస్టుగా ఈ సినిమా ఫస్ట్‌లుక్‌ విడుదలైంది. ఆశక్తికరంగా ఉంది ఈ లుక్‌. ఈ సినిమాలో సుమంత్‌ పాత్రలో కాస్త నెగిటివ్‌ షేడ్స్‌ ఉంటాయట. 

ఆ తర్వాత సుమంత్‌ చేయబోయే చిత్రంలో కంప్లీట్‌ విలనిజం చూపిస్తాడనీ టాక్‌ వినిపిస్తోంది. సీనియర్‌ నటుడు జగపతిబాబు హీరోగా నటించి, ఇప్పుడు విలన్‌గా సత్తా చాటుతున్నాడు. గోపీచంద్‌ విలన్‌గా నటించి, హీరో అయ్యాడు. ఆ కోవలోనే సుమంత్‌ కూడా హీరోగా ఫెయిల్యూర్స్‌ చవి చూస్తున్న నేపథ్యంలో విలన్‌గా కూడా తన టాలెంట్‌ చూపించే సాహసం చేయబోతున్నాడట. 

ఇటీవల 'మళ్లీ రావా' చిత్రంతో ఫర్వాలేదనిపించాడు. కానీ అంతకు ముందొచ్చిన 'నరుడా డోనరుడా' చిత్రంతో భారీగా నిరాశపరిచాడు. విభిన్న తరహా కథలను ఎంచుకోవాలనే దిశలో నయా యాంగిల్‌ స్టోరీస్‌ని ట్రై చేశాడు సుమంత్‌. కానీ అవేమీ తన ఒంటికి పడకపోయేసరికి, సరికొత్తగా నెగిటివ్‌ రోల్స్‌ ట్రై చేయనున్నాడనీ తెలుస్తోంది. అయినా సుమంత్‌ మంచి నటుడే. అన్ని హావభావాలు పలుకుతాయి సుమంత్‌లో. కాలం కలిసి రావడం లేదంతే. 'గోదావరి', 'గోల్కొండ హైస్కూల్‌' తదితర సక్సెస్‌లు తన ఖాతాలో ఉన్నప్పటికీ, ప్రస్తుతం సుమంత్‌కి టైం అంతగా కలిసి రావడం లేదు. 

ఓకే చూద్దాం ఒకవేళ విలన్‌గా కొత్త ట్రెండ్‌ సృష్టిస్తాడేమో. అన్నీ కలిసొచ్చి, సుమంత్‌ విలన్‌గా నటించడం నిజమే అయితే, ఈ కొత్త అవతారం సుమంత్‌కి ఎలాంటి సక్సెస్‌నిస్తుందో చూడాలి మరి.