టైమింగ్‌ కామెడీతో, కమెడియన్‌గా సూపర్‌ ఇమేజ్‌ సంపాదించుకున్న సునీల్‌ హీరో కావాలనే కోరికతో కామెడీకి టాటా బైబై చెప్పేశాడు. ఎట్టకేలకు 'అందాల రాముడు' సినిమాతో ఆ ముచ్చట తీర్చేసుకున్నాడు. ఆ తర్వాత వచ్చిన 'మర్యాద రామన్న', 'పూలరంగడు' తదితర సినిమాలతో హీరోయిజం చూపించేశాడు. కానీ, ఆ తర్వాత చతికిలబడ్డాడు. డల్‌ ఆటిట్యూడ్‌తో హీరోయిజం ప్రదర్శిస్తూ, ప్రేక్షకుల ఆదరణకు దూరమయ్యాడు. ప్రయత్నించీ, ప్రయత్నించీ విఫలమై, ఇక చివరకు తనకు కామెడీనే బెస్ట్‌ ఆప్షన్‌ అనుకుని, ఈ మధ్య కామెడీ రోల్స్‌తో తిరిగి మెప్పిస్తున్నాడు. దాంతో మళ్లీ సునీల్‌ ఐడెంటిటీని ప్రేక్షకులు గుర్తిస్తున్నారు. ఇప్పుడిప్పుడే కమెడియన్‌గా బిజీ అవుతున్న తరుణంలో మళ్లీ సునీల్‌ హీరోయిజం చూపించాలనుకుంటున్నాడట. అయితే ఈ సారి సునీల్‌ కాస్త సాహసం చేయనున్నాడు. ఓ బాలీవుడ్‌ రీమేక్‌లో నటించనున్నాడట. ఈ సినిమాలో హీరో అంధుడి పాత్రలో కనిపించనున్నాడు. మరి తెలుగులోకి రీమేక్‌ అయ్యే ఈ సినిమాలో సునీల్‌ పాత్రను కూడా అదే రకంగా డిజైన్‌ చేస్తారా? లేక సునీల్‌ ఒంటికి పడదేమో అని కాస్త జాగ్రత్త తీసుకుంటారా? చూడాలి మరి.
అయుష్మాన్‌ ఖురానా హీరోగా నటించిన 'అంధాదున్‌' అనే ఈ సినిమాని తమిళంలోనూ రీమేక్‌ చేసేందుకు సన్నాహాలు జరుగుతున్నాయి. తమిళంలో అయితే, ధనుష్‌, సిద్ధార్ద్‌ వంటి స్టార్లు ఈ పాత్రకు పోటీ పడుతున్నారు. మరి సునీల్‌ ఏం చేస్తాడో ముందు ముందు తెలుస్తుంది. ఇదిలా ఉంటే, సునీల్‌ ప్రస్తుతం కమెడియన్‌గా బిజీగానే ఉన్నాడు. ఈ మధ్య వచ్చిన పలు చిత్రాల్లో సునీల్‌ ఎక్కడో చోట తారసపడుతూనే ఉన్నాడు. శ్రీహరి తనయుడు మేఘాంష్‌ హీరోగా పరిచయమవుతున్న 'రాజ్‌దూత్‌' సినిమాలో కీలక పాత్రధారి అయిన బైక్‌కి సునీల్‌ వాయిస్‌ ఓవర్‌ అందిస్తున్నాడు.
