ఒక‌ప్పుడు హాస్య‌న‌టుడిగా సునీల్ ఫుల్ బిజీ. ఆ త‌ర‌వాత హీరోగా మారాడు. తొలుత హీరో పోజులు బాగానే ఉన్నా, ఆ త‌ర‌వాత వ‌రుస ఫ్లాపులు వ‌చ్చాయి. మ‌ధ్య‌లో కామెడీ ఆఫ‌ర్లు ఎన్నొచ్చినా ప‌ట్టించుకోని సునీల్... హీరోగా ప‌రాజ‌యాలు త‌ట్టుకోలేక‌... మ‌ళ్లీ కామెడీ పాత్ర‌ల వైపే రావాల్సివ‌చ్చింది. కానీ.. సునీల్ లో ఇది వ‌ర‌క‌టి టైమింగ్ బొత్తిగా క‌నిపించ‌క‌పోవ‌డం, త‌గిన పాత్ర‌లు ఇవ్వ‌క‌పోవ‌డం వ‌ల్ల సునీల్ కామెడీ యాంగిల్ లోనూ రాణించ‌లేదు.

అయితే క‌ల‌ర్ ఫొటోతో.. విల‌న్ గా మారాడు సునీల్. ఆ పాత్ర మంచి గుర్తింపు తెచ్చింది. దాంతో వ‌రుస‌గా విల‌న్ ఆఫ‌ర్లు వ‌స్తున్నాయి. తాజాగా `పుష్ష‌`లో న‌టించ‌డానికి ఒప్పుకున్నాడు సునీల్. అందులో సునీల్ ది నెగిటీవ్ ట‌చ్ ఉన్న పాత్ర అని తెలుస్తోంది. అటు కామెడీ, ఇటు విల‌నిజం.. ఇలా రెండూ ఉండ‌గానే మూడో ప‌డ‌వ కూడా ఎక్కేస్తున్నాడు. అదే.. హీరోగా. సునీల్ కి మ‌ళ్లీ హీరోగా ఛాన్సులు వ‌స్తున్నాయి. ఇటీవ‌ల వి.ఎన్‌.ఆదిత్య ద‌ర్శ‌క‌త్వంలో ఓ సినిమా మొద‌లెట్టాడు సునీల్. అది దాదాపుగా పూర్తి కావొచ్చింది.

ఇది పూర్తిగా ఓటీటీ కోసం తీసిన సినిమా అని స‌మాచారం. ఇప్పుడు `బెల్ బోటెమ్‌` అనే క‌న్న‌డ సినిమాని రీమేక్ చేయాల‌ని చూస్తున్నాడ‌ట‌. ద‌ర్శ‌కుడు, నిర్మాత కూడా రెడీ. ఈ రెండు సినిమాల్లో ఏది హిట్ట‌యినా సునీల్ మ‌ళ్లీ హీరోగా బిజీ అయిపోతాడు. జ‌యాప‌జ‌యాల మాట ఎలా ఉన్నా - సునీల్ ప్ర‌స్తుతానికి య‌మ బిజీగా ఉన్నాడు. అది చాల‌దూ.