చిత్ర‌సీమ‌లో సెంటిమెంట్లు ఎక్కువ. తెలుగు వాళ్ల‌కైతే మ‌రీనూ. ఓ సినిమా హిట్ట‌యితే.. ఆ కాంబినేష‌న్ ని ఎన్నిసార్ల‌యినా రిపీట్ చేయాల‌నే చూస్తారు. ఫ్లాప్ అయితే.. దాని జోలికి చ‌చ్చినా వెళ్ల‌రు. ఏ న‌టుడిపైనైనా..ఐరెన్ లెగ్ అనే ముద్ర ప‌డితే - ఆ న‌టుడ్ని సినిమాలోకి తీసుకోవ‌డానికి ఒణికిపోతారు. అయితే కొంత‌మంది ఈ సెంటిమెంట్ల‌ని ఏమాత్రం ప‌ట్టించుకోరు. శంక‌ర్ అలాంటివాడే. శంక‌ర్ - రామ్ చ‌ర‌ణ్ ల కాంబినేష‌న్ లో ఓ సినిమా రూపుదిద్దుకుంటున్న సంగ‌తి తెలిసిందే.
దిల్ రాజు నిర్మాత. కైరా అద్వాణీ క‌థానాయిక. ఈ చిత్రంలో ప్ర‌తినాయ‌కుడిగా సురేష గోపీ న‌టించ‌నున్నాడ‌ని టాక్‌. సురేష్ గోపీ - చ‌ర‌ణ్ లు ఢీ అంటే ఢీ అంటూ త‌ల‌ప‌డ‌డం తెలుగు తెర‌కు కొత్త‌గానే ఉంటుంది. అయితే సురేష్ గోపీది చాలా బ్యాడ్ సెంటిమెంట్. శంక‌ర్ తో ఇది వ‌ర‌కు ఐ సినిమాలో న‌టించాడు సురేష్ గోపీ. ఆ సినిమా ఫ్లాప్ అయ్యింది. తెలుగులో సురేష్ గోపీ చేసిన ఒక‌ట్రెండు సినిమాలు ఫ్లాప్ అయ్యాయి. దాంతో.. మెగా ఫ్యాన్స్ సురేష్ గోపీ అన‌గానే భ‌య‌ప‌డిపోతున్నారు.
ఈ విష‌యం దిల్ రాజు కూడా శంక‌ర్ తో ప్ర‌స్తావించాడ‌ట. అయితే శంక‌ర్ మాత్రం ఇవేం ప‌ట్టించుకోవ‌డం లేద‌ని తెలుస్తోంది. సురేష్ గోపీ మంచి న‌టుడు. అది కాద‌న‌లేని నిజం. అందుకే శంక‌ర్ సురేష్ గోపీకి అంత వెయిటేజ్ ఇస్తున్నాడు. మ‌రి ఈ సెంటిమెంట్ ఈ సారి ఏమ‌వుతుందో?
