ఆంధ్ర‌ప్ర‌దేశ్ కొత్త ముఖ్య‌మంత్రి వై.ఎస్‌.జ‌గ‌న్ పాత్ర‌లో సూర్య క‌నిపించ‌బోతున్నాడా? అవున‌నే అంటున్నాయి టాలీవుడ్ వ‌ర్గాలు. వై.ఎస్‌.రాజ‌శేఖ‌ర్‌రెడ్డి చేసిన పాద యాత్ర ఆధారంగా 'యాత్ర‌' సినిమా తెర‌కెక్కిన సంగ‌తి తెలిసిందే.మ‌హి వి రాఘ‌వ ద‌ర్శ‌క‌త్వం వ‌హించాడు. వైఎస్ పాత్ర‌ని మ‌మ్ముట్టి పోషించాడు. ఆ సినిమా బాగానే ఆడింది. ఇప్పుడు 'యాత్ర 2'కి శ్రీ‌కారం చుట్టాల‌ని మ‌హి భావిస్తున్నాడు. పాద యాత్ర చేసిన వై.ఎస్‌. రాజ‌శేఖ‌ర్‌రెడ్డి ముఖ్య‌మంత్రి అవ్వ‌డంతో 'యాత్ర‌' క‌థ ముగిసింది.

వై.ఎస్ మ‌ర‌ణాంత‌రం ఏర్ప‌డిన ప‌రిణామ‌ల నుంచి `యాత్ర 2` మొద‌ల‌వుతుంది. జ‌గ‌న్ ముఖ్య‌మంత్రి అవ్వ‌డంతో `యాత్ర 2` క‌థ ముగుస్తుంది. ఇదంతా జ‌గ‌న్ స్టోరీ. ఆ పాత్ర‌లో సూర్య క‌నిపిస్తే బాగుంటుంద‌ని మ‌హి భావిస్తున్నాడ‌ట‌. సూర్య - జ‌గ‌న్ మంచి మిత్రులు. అందుకే... జ‌గ‌న్ పాత్ర‌లో సూర్య సూట‌వువ‌తాడ‌ని మ‌హి న‌మ్ముతున్నాడు. సూర్య ద‌గ్గ‌ర ఈ విష‌యం ప్ర‌స్తావిస్తే... ''ఆ క‌థ నా వ‌ర‌కూ వ‌చ్చి, స్క్రిప్టు న‌చ్చితే త‌ప్ప‌కుండా చేస్తా'' అని గ్రీన్ సిగ్న‌ల్ ఇచ్చేశాడు. మ‌రి ఈ సినిమా ఎప్పుడు ప‌ట్టాలెక్కుతుందో చూడాలి.