బాలీవుడ్ యువ స్టార్ హీరో సుశాంత్ సింగ్ రాజ్‌పుత్ మ‌ర‌ణం అంద‌రినీ క‌లిచి వేస్తోంది. డిప్రెష‌న్ వ‌ల్లే సుశాంత్ ఆత్మ హ‌త్య చేసుకున్నాడ‌ని పోలీసులు నిర్దారించినా, ర‌క‌ర‌కాల కార‌ణాల్ని అన్వేషిస్తున్నారు జ‌నాలు. ప్రేమ విఫ‌లమైనందుకే ఈ నిర్ణ‌యం తీసుకున్నాడ‌ని కొంత‌మంది అంటుంటే, సుశాంత్ ఆర్థిక ఇబ్బందుల్లో ఉన్నాడ‌ని, అందుకే బ‌ల‌వ‌న్మ‌ర‌ణానికి పాల్ప‌డ్డాడ‌ని ఇంకొంత‌మంది అంటున్నారు. సుశాంత్ చేతిలోంచి వ‌రుస‌గా ఏడు భారీ ప్రాజెక్టులు చేజారిపోయాయ‌ని, సుశాంత్ న‌టించిన సినిమా కూడా లాక్‌డౌన్ వ‌ల్ల విడుద‌ల కాకుండా ఆగిపోయింద‌ని, అందుకే ఆత్మ‌హ‌త్య చేసుకున్నాడ‌ని అనుకుంటున్నారు.
ఈ నేప‌థ్యంలో సుశాంత్ ఆస్తుల చిట్టా బ‌య‌ట‌కు వ‌చ్చింది. సుశాంత్ స్థిర చ‌ర ఆస్తుల్నీ క‌లిపి దాదాపు 70 కోట్ల వ‌ర‌కూ ఉంటాయ‌ట. త‌న‌కు కార్లంటే చాలా ఇష్టం. తాను కొన్న స్పోర్ట్స్‌కార్స్ అన్నీ క‌లిపితే దాదాపు 10 కోట్ల‌పైమాటే అని తెలుస్తోంది. అంతేకాదు.. అంత‌రిక్షంలోనూ ఓ ఫ్లాట్ కొన్నాడ‌ట సుశాంత్. అలా భూమిని దాటి ఫ్లాట్‌ని కొనుగోలు చేసిన తొలి భార‌తీయ స్టార్ సుశాంతే. ఇన్ని ఆస్తులున్న‌ప్పుడు సుశాంత్‌కి ఆర్థిక ఇబ్బందులు ఉన్నాయ‌ని చెప్ప‌డం హాస్యాస్పద‌మే అవుతుంది.
