ఎంద చాట.. కాట్ర‌వ‌ల్లీ.. అంటూ విచిత్ర‌మైన భాష‌లో మాట్లాడుతుంటాడు అలీ. ఈ ప‌ద ప్ర‌యోగాలు తొలి సారి చూసింది `రాజేంద్రుడు గ‌జేంద్రుడు` సినిమాలోనే. అందులో అలీ ఊత‌ప‌దం `చాట..`. అప్ప‌టి నుంచీ.. తెలుగులో అదో మాట‌గా చ‌లామ‌ణీ అయిపోతోంది. అస‌లు ఈ చాట అనే ప‌దం ఎలా పుట్టింది? ఎలా వ‌చ్చింది? రూప‌క‌ర్త ఎవ‌రు? ఈ విష‌యాల్ని ఇటీవ‌ల ఎస్వీ కృష్ణారెడ్డి ఓ ఇంట‌ర్వ్యూలో పంచుకున్నారు.
రాజేంద్రుడు గ‌జేంద్రుడు సినిమా ప‌ట్టాలెక్కే స‌మ‌యంలో - ర‌చ‌యిత దివాక‌ర్ బాబు అలీని వెంట‌బెట్టుకుని కృష్ణారెడ్డిని క‌లిశారు. ``అలీ అని మంచి న‌టుడు. త‌న‌లో చాలా ప్ర‌తిభ ఉంది. విచిత్ర‌మైన భాష మాట్లాడ‌తాడు. అస‌లు ఆ భాషేంటో కూడా అర్థం కాదు. కానీ విన‌డానికి బాగుంటుంది`` అని ప‌రిచ‌యం చేశార్ట. అప్పుడే అలీ.. `ఎంత చాట.` అంటూ చాట భాష మాట్లాడేస‌రికి న‌వ్వు ఆపుకోలేక‌పోయార్ట. వెంట‌నే త‌న సినిమాలో ఛాన్స్ ఇచ్చేశారు.
ఆ సినిమాలో బ్ర‌హ్మానందం - అలీ మ‌ధ్య ఓ సీన్ ఉంటుంది. అలీ ఏం మాట్లాడుతున్నాడో అర్థం కాక, బ్ర‌హ్మానందం జుత్తు పీక్కునే సీన్ అది. ఆరోజు అలీ సెట్‌కి వెళ్లిన‌ప్పుడు సీన్ పేప‌ర్ ఏమీ ఇవ్వ‌లేద‌ట. ``నీకు డైలాగులు ఏం రాయ‌లేదు. నీకు వ‌చ్చిన భాష‌లో మాట్లాడేయ్.. చాలు..`` అన్నార్ట. ఇక అలీ రెచ్చిపోయాడు. ఆ సీన్ చేస్తున్న‌ప్పుడు సెట్లో అంద‌రూ న‌వ్వుతూనే ఉన్నార్ట. ఏమాత్రం రిహార్స‌ల్స్ లేకుండా, సింగిల్ టేక్ లో తీసిన స‌న్నివేశం అది. బాగా పండింది. అలీకి అక్క‌డి నుంచి అవ‌కాశాలు వ‌రుస క‌ట్టాయి.
ఓరోజు.. అలీ ఎక్క‌డికో వెళ్తే... ఓ చిన్న‌మ్మాయి.. `అమ్మా.. చాట‌గాడు అడుగో` అంటూ అలీని త‌న అమ్మ‌కు చూపించింద‌ట. అప్ప‌టి నుంచీ.. అలీ చాట గాడు అయిపోయాడు. ఇంత‌కీ చాట అంటే ఏమిటో అలీకీ తెలీదు.. ఎస్వీ కృష్ణారెడ్డికీ తెలీదు.
