ఒకటి కాదు, రెండు కాదు.. ఏకంగా ఆరు సినిమాలు తాప్సీ నుంచి రాబోతున్నాయట 2021లో. వీటిల్లో కొన్ని ఇప్పటికే నిర్మాణంలో వుండగా, ఇంకొన్ని సెట్స్‌ మీదకు వెళ్ళాల్సి వుంది. అయినాగానీ, కనీసం అరడజను.. అంతకు మించి సినిమాలు 2021లో విడుదలయ్యే అవకాశముందంటూ తాప్సీ గురించి బాలీవుడ్‌లో చర్చ జరుగుతోంది.
బాలీవుడ్‌లోనే కాదు, సౌత్‌లో కూడా రెండు సినిమాలు చేస్తోంది తాప్సీ. అందులో ఒకటి విజయ్‌ సేతుపతి సరసన కావడం గమనార్హం. మరోటి తెలుగు సినిమా. '2020 కరోనా కారణంగా ఇబ్బంది పడ్డాం. 2021లో కొత్త ఉత్సాహం కన్పించబోతోంది.. వ్యాక్సిన్‌ తొందరగా వచ్చేసి, సినిమా థియేటర్లు కళకళ్ళాడాలని ఆశిస్తున్నా.. నా నుంచి చాలా సినిమాలు రాబోతున్నాయ్‌..' అంటూ తాప్సీ తాజాగా ఓ ఇంటర్య్యూలో చెప్పింది.
తాను చేస్తోన్న సినిమాల్లో చాలావరకు ప్రతిష్టాత్మక సినిమాలేనని తాప్సీ అంటోంది. వీటిల్లో 'రష్మి రాకెట్‌' తాప్సీకి వెరీ వెరీ స్పెషల్‌. ఛాలెంజింగ్‌ రోల్స్‌ని ఇష్టపడే తాప్సీ, అలాంటి సినిమాల కోసం కనీ వినీ ఎరుగని రీతిలో కష్టపడుతోంది. ఈ క్రమంలో ఆమెను సక్సెస్‌లు కూడా బాగానే పలకరిస్తున్నాయి. గ్లామరస్‌ రోల్స్‌ మాటేమిటి.? అంటే, 'ప్రస్తుతానికైతే ఆ ఆలోచన నుంచి కాస్త విరామం తీసుకున్నా..' అని నవ్వేసింది తాప్సీ. రెండు మూడు తెలుగు సినిమాలు తాప్సీకి చర్చల దశలో వున్నాయట.
