కళ్యాణ్‌రామ్‌ హీరోగా 'ఎమ్మెల్యే' సినిమా తెరకెక్కుతోన్న సంగతి తెలిసిందే. ఈ సినిమాలో కాజల్‌ అగర్వాల్‌ కళ్యాణ్‌రామ్‌తో జత కడుతోంది. అయితే ఈ సినిమా సంగతి పక్కన పెడితే, మనోడు మిల్కీ బ్యూటీ తమన్నాతోనూ ఓ సినిమా చేస్తున్నాడు. ఈ సినిమాలోని ఓ సాంగ్‌ని తాజాగా తెరకెక్కించారు. జయేంద్ర దర్శకత్వంలో ఈ సినిమా తెరకెక్కుతోంది. కూల్‌ బ్రీజ్‌ సినిమాస్‌, ఈస్ట్‌ కోస్ట్‌ ప్రొడక్షన్స్‌ సంయుక్తంగా ఈ సినిమాని రూపొందిస్తున్నాయి. 'పటాస్‌' సినిమాతో సూపర్‌ హిట్‌ కొట్టాడు కళ్యాణ్‌రామ్‌. ఆ తర్వాత పూరీతో 'ఇజం' సినిమాలో నటించాడు.

న్యూ గెటప్‌తో, న్యూ బాడీ లాంగ్వేజ్‌తో ఆకట్టుకున్నాడు ఈ సినిమాలో కానీ, సినిమా ఆశించిన స్థాయిలో విజయం అందుకోలేకపోయింది. దాంతో కళ్యాణ్‌రామ్‌ రేసులో మళ్లీ వెనకబడ్డాడు. అందుకే వరుసగా రెండు సినిమాలతో వస్తున్నాడు. ఈ మధ్యనే తమ్ముడు ఎన్టీఆర్‌తో 'జై లవకుశ' చిత్రాన్ని నిర్మించాడు. ఇప్పుడు రెండు సినిమాలతో హీరోగా బిజీ అయిపోయాడు. ఓ పక్క 'ఎమ్మెల్యే' సినిమాలో నటిస్తూనే, మరో పక్క కొత్త సినిమాలోనూ నటిస్తున్నాడు. 'ఎమ్యెల్యే' సినిమా పొలిటికల్‌ బ్యాక్‌ డ్రాప్‌లో రూపొందుతుండగా, తాజా చిత్రం పక్కా రొమాంటిక్‌ ఎంటర్‌టైనర్‌గా రూపొందుతోంది.

మిల్కీ బ్యూటీ తమన్నా, కళ్యాణ్‌రామ్‌ మధ్య కెమిస్ట్రీ అదరిపోనుందట ఈ సినిమాలో. తాజాగా తొలి షెడ్యూల్‌ షూటింగ్‌ కంప్లీట్‌ చేసుకుంది ఈ సినిమా. తొలి షెడ్యూల్‌లో భాగంగా కళ్యాణ్‌రామ్‌ - తమన్నా మధ్య ఓ రొమాంటిక్‌ సాంగ్‌ని చిత్రీకరించారు. ఈ సినిమాలో లొకేషన్స్‌కి ఎక్కువ ప్రాధాన్యత ఇస్తున్నారట. యాక్షన్‌ ఘట్టాలు కూడా ఆకట్టుకునేలా రూపొందనున్నాయట. విదేశాల్లోనే ఎక్కువ భాగం చిత్రీకరణ జరపనున్నారనీ చిత్ర యూనిట్‌ నుండి అందిన సమాచారమ్‌.