ఈమధ్య ప్రతిభావంతులైన యువ హీరోలకు డిమాండ్ పెరిగింది. అలా డిమాండ్ పెరిగిన వారిలో విశ్వక్ సేన్ కూడా ఒకరు. 'హిట్' సినిమాతో మంచి విజయం సాధించిన విశ్వక్ సేన్ ఇప్పుడు చాలా ప్రాజెక్టులకు గ్రీన్ సిగ్నల్ ఇచ్చారు. వీటిలో రెండు రీమేక్స్ కూడా ఉన్నాయి. అందులో ఓ సినిమాకు విశ్వక్ తన స్నేహితుడు తరుణ్ భాస్కర్ చేత డైలాగ్స్ రాయిస్తున్నాడట.
విశ్వక్ నటించబోతున్న సినిమాల్లో 'ఓ మై కడవులే' రీమేక్ కూడా ఉంది. ఈ సినిమాను పీవీపీ సినిమా వారు నిర్మిస్తున్నారు. ఈ సినిమాకు తరుణ్ భాస్కర్ అయితే కథకు తగ్గట్టుగా ట్రెండీగా డైలాగ్స్ రాయగలడని భావించి అతని పేరును విశ్వక్ నిర్మాతలకు సూచించారని సమాచారం. దీంతో భారీ రెమ్యూనరేషన్ ముట్టజెప్పి మరీ తరుణ్ భాస్కర్ ను డైలాగ్స్ కోసం తీసుకున్నారట. విశ్వక్ గతంలో 'ఈ నగరానికి ఏమైంది'.. 'ఫలక్ నుమాదాస్' సినిమాలకు తరుణ్ తో కలిసి పనిచేసిన సంగతి తెలిసిందే. ఈ సినిమాకు కలిసి పనిచేయడం మూడోసారి.
ఈ సినిమాకు సంబంధించిన దర్శకుడు, నటీనటులు, ఇతర టెక్నిషియన్ల వివరాలు త్వరలోనే వెల్లడవుతాయి. విశ్వక్ ఈ సినిమా కాకుండా 'పాగల్', 'హిట్ 2', సినిమాలను కూడా లైన్లో పెట్టాడు. 'కప్పేలా' రీమెక్ లో నటించేందుకు కూడా గ్రీన్ సిగ్నల్ ఇచ్చాడు.
