ఏజెంట్ సాయిశ్రీ‌నివాస ఆత్రేయ‌, జాతిర‌త్నాలు సినిమాల‌తో.. తెలుగు ప్రేక్ష‌కులపై చెర‌గ‌ని ముద్ర వేశాడు న‌వీన్ పొలిశెట్టి. రెండు సినిమాల‌తోనే టాలీవుడ్ లోనే క్రేజియ‌స్ట్ హీరో అయిపోయాడు. ఇప్పుడు ఏకంగా త్రివిక్ర‌మ్ తో సినిమా చేసేస్తున్నాడు. అవును... అయితే ఈ సినిమాని త్రివిక్ర‌మ్ ద‌ర్శ‌కుడు కాదు. నిర్మాత మాత్ర‌మే.

న‌వీన్ పొలిశెట్టి హీరోగా క‌ల్యాణ్ శంక‌ర్ ద‌ర్శ‌క‌త్వంలో ఓ చిత్రం రూపుదిద్దుకుంటోంది. దీనికి సాయి సౌజ‌న్య నిర్మాత‌. సాయి సౌజ‌న్య అంటే ఎవ‌రో కాదు. త్రివిక్ర‌మ్ భార్య‌. ఆమెని ఈ సినిమాతో త్రివిక్ర‌మ్ చిత్ర‌రంగంలో దింపాడ‌న్న‌మాట‌. సితార ఎంట‌ర్‌టైన్‌మెంట్స్‌, హారిక హాసిని సంస్థ‌లు.. త్రివిక్ర‌మ్ సొంత సంస్థ‌ల్లాంటివి. ఈ బ్యాన‌ర్‌లో ఏ సినిమా వ‌చ్చినా, అందులో త్రివిక్ర‌మ్ కి వాటా ఉంటుంది. త్రివిక్ర‌మ్ సినిమాల‌న్నింటికీ వీళ్లే నిర్మాత‌లు. అయితే సొంతంగా ఓ బ్యాన‌ర్ స్థాపించాల‌ని త్రివిక్ర‌మ్ ఎప్ప‌టి నుంచో భావిస్తున్నాడు. అలా... న‌వీన్ పొలిశెట్టితో త్రివిక్ర‌మ్ నేరుగా నిర్మాణ రంగంలో అడుగుపెట్టాడ‌న్న‌మాట‌.