ఈ మధ్య చాలా చిన్న సినిమాలకు వెంకీ బ్రాండ్‌ అంబాసిడర్‌గా మారిపోయారు. ఎన్నో చిన్న సినిమాల ప్రచార చిత్రాలను విడుదల చేసి, తన పెద్ద మనసు చాటుకుంటున్నారు. తాజాగా 'త్రీ మంకీస్‌' అనే సినిమా టీజర్‌ని విడుదల చేసి, తన ఖాతాలో మరో చిన్న సినిమాని యాడ్‌ చేసుకున్నాడు వెంకీ. ఓ పక్క తన సినిమాలు చేసుకుంటూనే, చిన్న సినిమాలకు చేయూతనందిస్తున్నారు.
వరుస పెట్టి టీజర్లు, ట్రైలర్లూ విడుదల చేస్తున్నారు. ఇక 'త్రీ మంకీస్‌' సినిమా విషయానికి వస్తే, జబర్దస్త్‌ ప్రోగ్రామ్‌తో బుల్లితెరపై విపరీతమైన క్రేజ్‌ సంపాదించుకున్న సుధీర్‌, రామ్‌ ప్రసాద్‌, గెటప్‌ శీను ముఖ్య పాత్రల్లో ఈ సినిమా తెరకెక్కుతోంది. ఈ ముగ్గురూ బుల్లితెరపై చేసే సందడి ఎలాంటిదో అందరికీ తెలిసిందే. పెద్ద తెర అంటే అంతకు మించి ఉండాలి కదా.
అవును అంతకు మించిన సందడితోనే ఈ సినిమా వస్తోందట. టికెట్‌కి పైసా వసూల్‌ ఫన్‌తో ఈ సినిమాని తెరకెక్కిస్తున్నారట. వెంకటేష్‌ ఆశీర్వాదంతో విడుదలవుతోన్న ఈ సినిమా మంచి విజయం సాధించాలని, బుల్లితెరపై మంచి పేరు దక్కించుకున్న ఈ ముగ్గురు పెద్ద తెరపై కూడా రాణించాలని ఆశిద్దాం. ఇదిలా ఉంటే, ఆల్రెడీ బిగ్‌ స్క్రీన్‌పై చిన్నా చితకా పాత్రలతో సుపరిచితులైన ఈ ముగ్గురూ ఈ సినిమాతో ఫుల్‌ లెంగ్త్‌ రోల్స్‌తో సందడి చేయనున్నారు.
