వెంక‌టేష్ - నాగ‌చైత‌న్య మామా అల్లుళ్లుగా న‌టించిన చిత్రం `వెంకీ మామా`. బాబి ద‌ర్శ‌క‌త్వం వ‌హించిన ఈ చిత్రాన్ని సురేష్ ప్రొడ‌క్ష‌న్స్ సంస్థ నిర్మించింది. తొలి రోజే డివైట్ టాక్ వ‌చ్చినా, వ‌సూళ్లు మాత్రం బాగానే ద‌క్కించుకుంది. శుక్ర‌వారం భారీ వ‌సూళ్లు అందుకున్న వెంకీ మామ‌.. శ‌ని, ఆదివారాల్లోనూ ఆ జోరు కొన‌సాగించింది. మొత్తానికి తొలి మూడు రోజుల్లో దాదాపు 17 కోట్ల షేర్ అందుకుంది. నైజాంలో ఈ చిత్రానికి ఇప్ప‌టి వ‌ర‌కూ 6.5 కోట్లు ద‌క్కాయి. సీడెడ్‌లో 2.65 కోట్లు, ఉత్త‌రాంధ్ర‌లో 2.2 కోట్లు, గుంటూరులో 1.5 కోట్లు వ‌చ్చాయి. కొన్ని ఏరియాల్లో శుక్ర‌వారానికి మించిన వ‌సూళ్లు ఆదివారం దక్కాయి.

ఈ మ‌ధ్య కాలంలో ఫ్యామిలీ మొత్తం కూర్చుని చూసే సినిమా ఏదీ రాలేదు. పైగా బాక్సాఫీసు ద‌గ్గ‌ర స్థ‌బ్ద‌త ఉంది. దాంతో వెంకీ మామ‌కు ప్ల‌స్ అయ్యింది. సోమ‌వారం నుంచి వెంకీ మామ‌కు అస‌లైన ప‌రీక్ష ఎదురుకానుంది. వీక్ డేస్‌లో వ‌సూళ్ల హ‌వా త‌గ్గే అవ‌కాశం ఉంది. అయితే అది ఎంత మేర‌కు అనేదాన్ని బ‌ట్టి వెంకీ మామ ఆర్థిక విజ‌యం ఆధార‌ప‌డి ఉంది.