భారీ అంచనాల నడుమ తెరకెక్కిన 'డియర్ కామ్రేడ్‌' ఇటీవల విడుదలై, మిక్స్‌డ్‌ టాక్‌తో రన్‌ అవుతోన్న సంగతి తెలిసిందే. అయితే, విజయ్‌ దేవరకొండకున్న స్టామినాతో సినిమాకి మంచి ఓపెనింగ్స్‌ వచ్చాయి. టాక్‌తో సంబంధం లేకుండానే, తన కెరీర్‌లోనే బిగ్గెస్ట్‌ వసూళ్లు అందుకున్నాడు ఈ సినిమాతో మన రౌడీ స్టార్‌. ప్రస్తుతం టాక్‌తో సంబంధం లేకుండా కొన్ని సినిమాలు మంచి వసూళ్లు సాధించి విజయవంతమవుతున్నాయి.
ఆ విషయాన్ని ఇంకోసారి 'డియర్ కామ్రేడ్‌' ప్రూవ్‌ చేసింది. ఈ పరిణామానికి తన అభిమానులే కారణమంటున్నాడు దేవరకొండ. అందుకే తన సినిమా సక్సెస్‌ని అభిమానులకే అంకితమిచ్చాడు. 'డియర్ కామ్రేడ్‌' సోలో మూవీ కావడంతో, వీకెండ్‌లో మంచి వసూళ్లు కొల్లగొట్టింది. మండే కూడా మంచి వసూళ్లకు ఆస్కారముంది. నైజాంలో బోనాల సందర్భంగా సోమవారం కూడా సెలవు కావడంతో, అది కామ్రేడ్‌కి బాగా కలిసొచ్చే అంశమే. విజయ్‌ దేవరకొండ భావించినట్లుగా ఈ సినిమా 100 కోట్ల క్లబ్‌లోకి చేరుతుందో లేదో చూడాలిక.
ఓవర్సీస్‌లోనూ 'డియర్ కామ్రేడ్‌' మంచి వసూళ్లు రాబడుతోంది. తెలుగుతో పాటు, తమిళ, మలయాళ, కన్నడ భాషల్లో ఈ సినిమా విడుదలైన సంగతి తెలిసిందే. జోడీ పరంగా, రష్మికా, విజయ్‌దేవరకొండ జంటకు మరోసారి మంచి పేరు దక్కింది. ప్రస్తుతం రష్మికా, మహేష్‌బాబుకు జోడీగా 'సరిలేరు నీకెవ్వరు' చిత్రంలో నటిస్తోంది. విజయ్‌ దేవరకొండ తదుపరి క్రాంతిమాధవ్‌ సినిమాతో బిజీ కానున్నారు.
