సెన్సేషన్‌కి బ్రాండ్‌ అంబాసిడర్‌గా మారిపోయాడు విజయ్‌ దేవరకొండ. ఎప్పుడు.. ఎక్కడ.. ఎలా.. ఎందుకు సెన్సేషన్‌ అవుతున్నాడో అర్ధం కాని పరిస్థితి మనోడి విషయంలో. ఇప్పుడీ సెన్సేషనల్‌ హీరో విజయ్‌ దేవరకొండ నటించిన 'డియర్‌ కామ్రేడ్‌' బాలీవుడ్‌లో రికార్డులు కొల్లగొడుతోంది. అదేంటీ.? బాలీవుడ్‌లో ఈ సినిమా ఎప్పుడు రిలీజయ్యిందా.? అని ఆశ్చర్యపోతున్నారా.? బాలీవుడ్‌లో రిలీజ్‌ కాలేదు కానీ, ఈ సినిమా హిందీ వెర్షన్‌ తాజాగా యూ ట్యూబ్‌లో రిలీజ్‌ చేశారు. ఇలా రిలీజయ్యిందో లేదో.. బాలీవుడ్‌ జనం ఈ సినిమాని చూసేందుకు క్యూ కట్టేశారు. అత్యధిక సంఖ్యలో ఈ సినిమాని యూ ట్యూబ్‌లో వీక్షించేశారు. అలా అదో రికార్డయిపోయి కూర్చుందిప్పుడు.
నిజానికి 'డియర్‌ కామ్రేడ్‌'కి తెలుగు రాష్ట్రాల్లో అంతగా ఆదరణ దక్కలేదు. అలాంటిది హిందీలో ఈ రేంజ్‌ పాపులారిటీ దక్కుతుండడంతో ఆశ్చర్యపోవడమే అందరి వంతవుతోంది. ఎప్పటి నుండో మనోడికి బాలీవుడ్‌పై కన్నుంది. ఆ నేపథ్యంలో కొందరు బాలీవుడ్‌ నిర్మాతల్ని కూడా బాగానే హోల్డ్‌లో పెట్టి ఉంచాడు. ఆ క్రమంలోనే ఇప్పుడు విజయ్‌ నటిస్తున్న 'ఫైటర్‌' నిర్మాణంలో బాలీవుడ్‌ ప్రముఖ నిర్మాత కరణ్‌ జోహార్‌ భాగస్వామ్యం పంచుకుంటున్న సంగతి తెలిసిందే. ఇక లేటెస్ట్‌గా 'డియర్‌ కామ్రేడ్‌' హిందీ వెర్షన్‌ ఎఫెక్ట్‌ చూస్తుంటే, 'ఫైటర్‌'కి అక్కడ తిరుగే ఉండదనిపిస్తోంది.
టోటల్‌గా ఈ తతంగం చూస్తుంటే, విజయ్‌ దేవరకొండ బాలీవుడ్‌ ఎంట్రీ ఘనంగానే జరిగేలా కనిపిస్తోంది. ఇక 'ఫైటర్‌' విషయానికి వస్తే, ఇటీవలే ముంబయ్‌లో ఈ సినిమా లాంఛనంగా స్టార్ట్‌ అయ్యింది. బాలీవుడ్‌ బ్యూటీ అనన్య పాండే ఈ సినిమాలో విజయ్‌కి జోడీగా నటిస్తోంది.
