'పెళ్లి చూపులు' సినిమాతో రాత్రికి రాత్రే స్టార్‌ అయిపోయాడు విజయ్‌ దేవరకొండ. చిన్న సినిమాల్లో పెద్ద విజయం సాధించడమే కాకుండా, ఇండస్ట్రీ దృష్టిని తన వైపుకు తిప్పుకున్న సినిమా 'పెళ్లి చూపులు'. అదే సక్సెస్‌ని 'అర్జున్‌రెడ్డి' సినిమాతో కంటిన్యూ చేశాడు విజయ్‌ దేవర కొండ. వివాదాల్లో చిక్కుకున్నా, సెన్సేషనల్‌ విజయాన్ని నమోదు చేసుకుంది ఈ సినిమా. తెలుగుతో పాటు, ఇతర భాషా చిత్ర పరిశ్రమలను కూడా ఆకర్షించాడు 'అర్జున్‌రెడ్డి'తో ఈ యంగ్‌ హీరో.
ఇప్పటికీ 'అర్జున్‌రెడ్డి' ప్రకంపనలు సోషల్‌ మీడియాలో వైబ్రేషన్స్‌ సృష్టిస్తూనే ఉన్నాయి. ఈ వరుస విజయాలతో ప్రముఖ నిర్మాతలు విజయ్‌ దేవరకొండతో సినిమాలు చేసేందుకు క్యూ కట్టారు. అలా వరుస పెట్టి ఆఫర్స్‌ అంది పుచ్చుకున్నాడు మనోడు. తాజాగా పరశురాం డైరెక్షన్‌లో విజయ్‌ దేవరకొండ ఓ సినిమా చేస్తున్నాడు. బన్నీ వాస్‌ ఈ సినిమాని నిర్మిస్తున్నారు. మలయాళ బ్యూటీ రష్మికా మండన్నా విజయ్‌తో జత కడుతోంది. ఈ సినిమాకి 'గీతా గోవిందం' అనే టైటిల్‌ని పరిశీలిస్తున్నట్లు తెలుస్తోంది. ఇదో కూల్‌ ఫ్యామిలీ ఎంటర్‌టైనర్‌. కథకి తగ్గట్లుగా ఈ టైటిల్‌ అయితే బావుంటుందనీ అనుకుంటోందట చిత్ర యూనిట్‌.
అయితే ఈ టైటిల్‌పై ఇంకా అఫీషియల్‌ క్లారిటీ రావాల్సి ఉంది. ఇవి కాక ఈ సెన్సేషనల్‌ హీరో మహానటి సావిత్రి జీవిత గాధ ఆధారంగా తెరకెక్కుతోన్న 'మహానటి' చిత్రంలో కీలక పాత్ర పోషిస్తున్నాడు. అలాగే శ్రీధర్‌ మర్రి దర్శకత్వంలో 'ఏం మంత్రం వేశావె' చిత్రంలో నటిస్తున్నాడు. ఇది కాక తమిళంలోనూ మనోడు అడుగెట్టబోతున్నాడు. 'నడిగయ్యర్‌ తిలగం' అనే సినిమాతో త్వరలోనే తమిళ ప్రేక్షకులను పలకరించనున్నాడు విజయ్‌ దేవరకొండ.
