బాలీవుడ్ స్టార్ హీరో హృతిక్ రోషన్ త్వరలో 'క్రిష్' ఫ్రాంచైజీ లో రూపొందనున్న 'క్రిష్ 4' సినిమాలో నటిస్తారని వార్తలు వస్తున్నాయి. ఈ విషయాన్ని ధృవీకరిస్తూ దర్శకులు, హృతిక్ నాన్నగారు రాకేష్ రోషన్ 'క్రిష్ 4' స్క్రిప్ట్ వర్క్ ప్రస్తుతం జరుగుతోందని ఓ ఇంటర్వ్యూలో చెప్పారు. హృతిక్ రోషన్ కెరీర్లో 'క్రిష్' సిరీస్ చిత్రాలు 'కోయీ మిల్ గయా', 'క్రిష్', 'క్రిష్ 3' చిత్రాలు అన్నీ హిట్లు కావడంతో ఇప్పుడు 'క్రిష్ 4' సినిమాపై కూడా ప్రేక్షకుల్లో భారీ ఆసక్తి నెలకొంది.
ఈ సినిమాకు ప్రస్తుతం స్క్రిప్ట్ వర్క్ తో పాటు ప్రీ ప్రొడక్షన్ వర్క్ కూడా ప్రారంభం అయిందని నటీనటులు టెక్నీషియన్ల ఎంపిక కూడా జరుగుతోందని సమాచారం. ఈ సినిమాలో విలన్ పాత్రకు ప్రముఖ తమిళ నటుడు విజయ్ సేతుపతి పేరును పరిశీలిస్తున్నారని బాలీవుడ్ మీడియాలో టాక్ వినిపిస్తోంది. విజయ్ సేతుపతి తమిళంతో పాటు ఇతర భాషల సినిమాల్లో కూడా నటిస్తున్నారు. హిందీలో లో అమీర్ ఖాన్ నటిస్తున్న 'లాల్ సింగ్ చద్దా' సినిమాలో కూడా విజయ్ సేతుపతి ఓ కీలక పాత్రలో నటిస్తున్నారు. ఈ సినిమా సేతుపతి కి బాలీవుడ్ ఎంట్రీ కానుంది. ఈ సినిమా విడుదల కాకమునుపే విజయ్ సేతుపతికి హృతిక్ రోషన్ సినిమాలో నటించే అవకాశం రావడం గొప్ప విషయమే అనుకోవాలి.
ఈ సినిమాను ఎప్పుడు లాంచ్ చేస్తారు? ఎప్పుడు సెట్స్ పైకి వెళుతుంది? అనే వివరాలు ఇంకా తెలియదు కానీ సినిమాలో విజయ్ సేతుపతి నటిస్తే ఒక క్రేజీ ప్రాజెక్ట్ గా మారుతుంది అని చెప్పడంలో ఎటువంటి సందేహం లేదు.
