చిరంజీవి ఫుల్ మాస్ అవ‌తారంలో ద‌ర్శ‌న‌మివ్వ‌బోతున్న సినిమా `వాల్తేరు వీర‌య్య`. శ్రుతిహాస‌న్ క‌థానాయిక‌గా న‌టిస్తున్న ఈ చిత్రానికి బాబి ద‌ర్శ‌కుడు. త్వ‌ర‌లోనే మ‌లేషియాలో కొత్త షెడ్యూల్ ప్రారంభం కానుంది. అక్క‌డ ఓ పాట‌ని, కొన్ని యాక్ష‌న్ దృశ్యాల్నీ తెర‌కెక్కించ‌బోతున్న‌ట్టు టాక్. అయితే ఇప్ప‌టి వ‌ర‌కూ ఈ సినిమాలో ప్ర‌తినాయ‌కుడు ఎవ‌ర‌న్న విష‌యం బ‌య‌ట‌కు రాలేదు.చిత్ర‌బృందం కూడా ఈ సంగ‌తి గోప్యంగానే ఉంచింది. ఈ పాత్ర కోసం ఓ స్టార్ ని బ‌రిలోకి దించాల‌ని గ‌ట్టిగా ప్ర‌య‌త్నిస్తోంది. ఎట్ట‌కేల‌కు ఆ ప్ర‌య‌త్నాలు ఓ కొలిక్కి వ‌చ్చాయ‌ని టాక్. ఈ సినిమాలో చిరుని ఢీ కొట్టే గ‌ట్టి విల‌న్ ని ప‌ట్టేశార‌ని తెలుస్తోంది. ఆ ఛాన్స్ విజయ్ సేతుప‌తికి ద‌క్కింద‌ట.
విజయ్ సేతుప‌తి.. బాబిల మ‌ధ్య ఇటీవ‌ల భేటీ జ‌రిగింది. ఈ క‌థ‌ని విజ‌య్‌కి వినిపించ‌డం, ఆయ‌న విల‌న్ గా న‌టించ‌డానికి ఒప్పుకోవ‌డం జ‌రిగిపోయాయ‌ని తెలుస్తోంది. ఇది వ‌ర‌కు `సైరా`లో విజయ్ సేతుప‌తి ఓ కీల‌క పాత్ర పోషించారు. అయితే పెద్ద‌గా గుర్తింపు రాలేదు. కానీ చిరు అంటే విజయ్ సేతుప‌తికి అమిత‌మైన అభిమానం. `మ‌రోసారి ఛాన్స్ వ‌స్తే చిరుతో క‌లిసి న‌టిస్తా` అని అప్పుడే త‌న మ‌న‌సులో మాట బ‌య‌ట‌పెట్టేశాడు. ఇప్పుడు ఆ ఛాన్స్ త‌న‌ని మ‌రోసారి వ‌రించింది. త్వ‌ర‌లోనే విజయ్ సేతుప‌తి ఎంట్రీ గురించిన అధికారిక ప్ర‌క‌ట‌న వ‌స్తుంద‌ని స‌మాచారం.
