తెలుగులో 'కొరియర్‌ బాయ్‌ కళ్యాణ్‌' సినిమాలో నితిన్‌ సరసన హీరోయిన్‌గా నటించిన యామీ గౌతమ్‌, అంతకు ముందు అల్లు శిరీష్‌ హీరోగా నటించిన తొలి చిత్రం 'గౌరవం' సినిమాలోనూ కనిపించి నటిగా మురిపించింది. అందం, అభినయం అన్నీ కలగలిసిన యామీ గౌతమ్‌, 'కాబిల్‌' అనే బాలీవుడ్‌ సినిమా ద్వారా విమర్శకుల ప్రశంసలు అందుకుంది. అంతకు ముందు కూడా కొన్ని బాలీవుడ్‌ సినిమాల్లో నటించినప్పటికీ 'కాబిల్‌' సినిమా తనను అంతకన్నా పెద్ద స్టార్‌ని చేసిందని యామీ గౌతమ్‌ చెబుతుంటుంది. ఇందులో హీరో హృతిక్‌ రోషన్‌తోపాటుగా అంధురాలిగా నటించింది యామీ గౌతమ్‌. ఇద్దరు అంధుల కథ ఇది. అంధురాలిగా యామీ నటన సింప్లీ సూపర్బ్‌. ఏ నటి అయినా కళ్ళతోనే భావాల్ని పలికించవలసి ఉంటుంది. కానీ ఆ కళ్ళ ద్వారా అభినయించే అవకాశం లేకపోవడం ఏ నటికి అయినా నటుడికి అయినా కత్తిమీద సామే. అయినప్పటికీ కూడా యామీ గౌతమ్‌ సత్తా చాటింది. ఆ సినిమా తర్వాత వచ్చిన ప్రశంసలు ఎప్పటికీ మర్చిపోనని చెప్పే యామీ గౌతమ్‌ అలాంటిదే ఇంకో సినిమా చేయాలని ఉందంటూ లేటెస్ట్‌గా చెప్పింది. 'బేబీ' సినిమాతో యాక్షన్‌ గర్ల్‌ అనిపించుకున్న తాప్సీ, దానికి ప్రీక్వెల్‌గా వచ్చిన 'నామ్‌ షబానా'లో మెప్పించినట్లే, యామీతో కూడా 'కాబిల్‌'కి ప్రీక్వెల్‌నో లేదంటే సీక్వెల్‌నో ప్లాన్‌ చేయొచ్చు కూడా. అలా ప్లాన్‌ చేస్తే యామీ గౌతమ్‌ కోరిక తీరుతుంది.